છોટાઉદેપુર: કહેવત છે ને કે જળ છે ત્યાં જીવન છે. પરંતુ જળ જ ન હોય તો જીવન કઈ રીતે શક્ય છે. આવી જ કંઈક સ્થિતિ છોટાઉદેપુર જિલ્લાના વઢવાણ ગામમાં છે. જ્યાં પીવાના પાણી માટે પણ લોકો વલખાં મારી રહ્યા છે. સ્થિતિ એટલી ગંભીર છે કે પીવાનું પાણી લેવા માટે લોકો દોરડાના સહારે 70 ફૂટ ઉંડા કૂવામાં નીચે ઉતરે છે.
કૂવામાં પાણી હોય તો સારું કહેવાય પરંતુ અહીં પણ લોકોના નસીબ ફૂટ્યા છે. કૂવામાં માત્ર એક ખાબોચીયું ભરેલું છે. જેમાંથી વ્યક્તિ ખોબે ખોબે પાત્રમાં પાણી એકઠું કરે છે. અને આ ડહોળું પાણી પીવા માટે લોકો મજબૂર બન્યા છે. પીવાનું પાણી મેળવવા લોકો પોતાનો જીવ જોખમમાં નાખી રહ્યા છે. એક તરફ સરકાર રાજ્યમાં પીવાનું પાણી પૂરતું હોવાનો દાવો કરી રહી છે.
તો બીજી બાજુ ગુજરાતમાં પીવાના પાણીની આવી ગંભીર સ્થિતિ સર્જાઈ છે. જે સરકારને નજરે પણ નથી પડતી. છોટાઉદેપુર જિલ્લો જેની બાજુમાં જ નર્મદા ડેમ આવેલો છે. તેમ છતાં અહીં લોકોને પાણી માટે વલખાં મારવાં પડે છે. 600થી વધુ લોકોની વસ્તી ધરાવતા આ વઢવાણ ગામમાં હેન્ડપમ્પ પાણીની ટાંકી કૂવા તમામ સગવડ છે.
પરંતુ તમામ પાણીના સ્ત્રોતો શોભાના ગાંઠીયા સમાન છે. લોકો રાહ જૂએ છે કે કૂવાના તળીયામાં ક્યારે પાણી આવે. અને પાણી ભરવા માટે કૂવામાં નીચે ઉતરે. તળીયામાં પાણીનું ખાબોચીયું ભરાતા જ લોકો જીવના જોખમે કૂવામાં દોરડાના સહારે ઉતરે છે. અને બાદમાં આ જ ગંદુ દેખાતું પાણી લોકો પીવા માટે ઉપયોગમાં લે છે.