ઈલેક્શનાલિસીસ / પૂર્વ CMની સાથે કેટલાય મોટામાથા ઠરીઠામ થઈ ઘરે બેસ્યા, આ બેઠકો પર ભાજપે કયા ઉમેદવારને ઉતાર્યા?, શું નવા ચહેરા ઉણા ઉતરશે

• ભાજપના જૂના જોગીઓના સ્થાને નવા ઉમેદવારોને તક 
• પૂર્વ સીએમ વિજય રૂપાણીના સ્થાને દર્શિતાબેન શાહને ટિકિટ
• ભાજપે નવા ઉમેદવારોને તક આપી

ગુજરાત ચૂંટણીને લઇને આજે ભાજપે એક સાથે 160 ઉમેદવારોની યાદી જાહેર કરી દીધી છે.  ઉમેદવારોની યાદીમાં પહેલા તબક્કાના 83 જયારે બીજા તબક્કાના 77 ઉમેદવારોને સ્થાન આપવામાં આવ્યું છે. ત્યારે ભાજપ દ્વારા ઉમેદવારોની યાદી જાહેર કરવામાં આવે તે પહેલા પૂર્વ સીએમ વિજય રૂપાણી અને ડેપ્યુટી સીએમ નીતિન પટેલ સહીત અનેક સિનિયર નેતાઑએ ચુંટણી ન લડવાની જાહેરાત કરી હતી. ત્યારે આ સીટ પરથી નવા ઉમેદવારોને પણ તક આપવામાં આવી છે.

વિજય રૂપાણીના સ્થાને દર્શિતાબેન શાહને તક
પૂર્વ મુખ્યમંત્રી અને ભાજપના અગ્રણી નેતા વિજય રૂપાણીએ ગઈકાલે કહ્યું હતું કે  હું ચૂંટણી નહીં લડું. તેમને જણાવી દઈએ કે વિજય રૂપાણી વિજય રૂપાણી રાજકોટ પશ્ચિમ બેઠક પરના ધારાસભ્ય છે. હવે ભાજપે તેમના સ્થાને દર્શિતાબેન શાહને ટિકિટ આપી છે.  તો મહેસાણા સીટ પરથી નીતિન પટેલે પણ ચુંટણી લડવાની મનાઈ કરી હતી. હવે ભાજપે તેના સ્થાને મુકેશ પટેલને મેદાનમાં ઉતાર્યા છે. વધુમાં ધોળકા બેઠક પરથી ભૂપેન્દ્રસિંહ ચુડાસમાએ ચુંટણી લડવાની ના પાડતા હવે આ સીટ પર કિરીટસિંહ ડાભી ઉમેદવાર હોય શકે છે.
  
ધારાસભ્ય આર. સી. ફળદુના સ્થાને દિવ્યેશ અકબરીને ટિકિટ 
એ જ રીતે બોટાદ બેઠક પરથી પૂર્વ મંત્રી સૌરભ પટેલએ ચુંટણી લડવાની  ના પડતાં ઘનશ્યામ વિરાણીને ટિકિટ મળી છે. તો જામનગર દક્ષિણના ધારાસભ્ય આર. સી. ફળદુના સ્થાને દિવ્યેશ અકબરીને તક આપવામાં આવી છે. જ્યારે અમદાવાદના નારણપુરાથી કૌશિક પટેલની જગ્યાએ જીતેન્દ્રભાઈ પટેલને  ટિકિટ મળી છે. વધુમાં અમદાવાદની જ ઠક્કરબાપા નગર બેઠક પરથી વર્તમાન ધારાસભ્ય વલ્લભ કાકડિયાએ પણ ચૂંટણી નહીં લડવાની જાહેરાત કરતા તેમની જગ્યાએ કંચનબેન રાદડિયાને ટિકિટ આપવામાં આવી છે.
 
આ બેઠકો પર ઉમેદવારોના નામની જાહેરાત બાકી 
વધુમાં અમદાવાદ જિલ્લાની વટવા બેઠક પરથી ધારાસભ્ય અને પૂર્વ ગૃહમંત્રી પ્રદીપસિંહ જાડેજાએ ચુંટણી ન લડવાનું કહ્યું હતું. જો કે આ બેઠક પર હજુ સુધી ઉમેદવારની જાહેરાત કરવામાં આવી નથી. તો ભાવનગર પૂર્વમાંથી વિભાવરીબેન દવે અને વડોદરાની માંજલપુર બેઠક પરથી ધારાસભ્ય યોગેશ પટેલે પણ ચુંટણી લડવાની ના પાડી છે. જોકે આ નેતાઑના સ્થાને હજુ કોઈને ટિકિટ આપવામાં આવી નથી.  

160 ઉમેદવારના નામ જાહેર
ગુજરાતમાં 182 બેઠકો પર ચૂંટણી યોજાવાની છે, રાજકીય પક્ષો લાંબા સમયથી ઉમેદવારો માટે હોડ કરી રહ્યા હતા, ભાજપ પણ અનેક બેઠકો બાદ નામો ફાઇનલ કરી શકી અને પ્રથમ યાદીમાં 160 ઉમેદવારોના નામ જાહેર કર્યા.ભાજપે તેની પ્રથમ યાદીમાં 69 જૂના ચહેરાઓને તક આપી છે, જો છેલ્લી વખતની વાત કરીએ તો 2017માં ભાજપે ગુજરાતમાં 99 બેઠકો જીતી હતી. બાદમાં પેટાચૂંટણીમાં ભાજપે ઝંડો લહેરાવવાનું ચાલુ રાખ્યું અને ધીમે ધીમે 111 સીટો પર પહોંચી.