EXCLUSIVE / વડોદરામાં રહેતા પૂર્વ વિંગ કમાંડર વિજય કર્ણિકના જીવન પર બની છે ફિલ્મ BHUJ, સાંભળો યુદ્ધની કહાની યોદ્ધાની જુબાની

• વેટરન વિંગ કમાંડર વિજય કર્નિક પર ફિલ્મ નિર્માણ
• 'The Pride Of Bhuj'  ફિલ્મ બની છે
• ભુજની માધાપરની મહિલાઓનું અદભૂત યોગદાન

વડોદરામાં રહેતા વોર વેટરન વિંગ કમાંડર વિજય કર્ણિકના જીવન પર ફિલ્મ પ્રોડ્યુસર અભિષેક ધુધૈયાએ ધ પ્રાઈડ ઓફ ભુજ ફિલ્મ બનાવી છે. જેમાં ભારત પાકિસ્તાન વચ્ચે 1971માં થયેલા યુદ્ધની સ્ટોરી ફિલ્મમાં બતાવવામાં આવી છે. ભારત દેશની રક્ષા જવાનો કરી રહ્યા છે, ત્યારે વડોદરામાં રહેતા વોર વેટરન વિંગ કમાંડર વિજય કર્ણિક દેશના એક એવા યોધ્ધા છે. જેમને ભારત દેશ માટે ત્રણ ત્રણ યુદ્ધ લડ્યા છે. વિજય કર્ણિકે દેશ માટે 1962, 1965 અને 1971માં યુદ્ધ લડ્યા છે.

કર્ણિક પરિવારના ચારેય ભાઈએ દેશ માટે કરી સેવા

વિજય કર્ણિક ઉપરાંત તેમના ત્રણેય ભાઈઓ પણ દેશની સેવામાં જોડાયા છે. વિજય કર્ણિકના ભાઈ વિનોદ કર્ણિક મેજર જનરલ, લક્ષ્મણ કર્ણિક વીંગ કમાન્ડર અને અજય કર્ણિક એર માર્શલ તરીકે દેશની રક્ષા કરી રહ્યા છે. મહત્વની વાત એ છે કે ભારત પાકિસ્તાન વચ્ચે વર્ષ 1971માં થયેલ યુદ્ધમાં ચારેય ભાઈઓ સામેલ હતાં. જેમાં વિજય કર્ણિક અને લક્ષ્મણ કર્ણિક ભુજ બેઝ પર ફરજ પર હતા, જામનગર એર બેઝ પર અજય કર્ણિક પાઇલોટ ઓફિસર તરીકે હતાં. જ્યારે રાજસ્થાન બોર્ડર પર કેપ્ટન વિનોદ કર્ણિક હતાં. આ ચારેય ભાઈઓ પિતા શ્રીનિવાસ અને માતા તારાબાઈની પ્રેરણાથી દેશની સેવામાં જોડાયા હતાં. 

72 કલાકમાં બનાવ્યો હતો એરબેઝનો રનવે

વર્ષ 1971ના યુદ્ધમાં પાકિસ્તાને ભુજ એર બેઝના રનવે  બોમ્બ મારો કરી રન-વેને ભારે નુકશાન પહોંચાડ્યું છે. જેના કારણે રન વે એરફોર્સ માટે બિનઉપયોગી બન્યો હતો. રન-વેનું સમારકામ કરતાં કોન્ટ્રાકટર અને મજૂરો પણ પાકિસ્તાન દ્વારા સતત કરવામાં આવતી બોમ્બિંગથી ગભરાઈ ભાગી ગયા હતાં. તેવામાં વિજય કર્ણિક અને તેમના પત્નીએ ભુજના માધાપૂર ગામના સરપંચ અને મહિલાઓને રન વે બનાવવા માટે સમજાવ્યા હતાં.

જેથી માધાપર ગામની 300 મહિલાઓએ ચાલુ યુધ્ધે, બોમ્બમારા વચ્ચે માત્ર 72 કલાકમાં જ ફરીથી રન વે તૈયાર કરી દીધો હતો. જેનાથી એરફોર્સના અધિકારીઓએ ફરીથી ભુજથી પાકિસ્તાનના કરાચીમાં હુમલા શરૂ કર્યા હતાં. જેનાથી પાકિસ્તાને ઘૂંટણ ટેકવી દીધા હતાં. અને ભારતનો યુદ્ધમાં વિજય થયો હતો. પાકિસ્તાનના દાંત ખાટા કરનાર વિજય કર્ણિકને ગળથુથીમાંથી દેશભક્તિના સંસ્કાર મળ્યા હતાં. તે દેશ માટે ગૌરવરૂપ છે.