ભારતમાં વીડિયો સ્ટ્રીમિંગ પ્લેટફોર્મ્સ ઉપર કોઈ પ્રકારની સેન્સરશિપ લાગુ પડતી નથી. આ નિયંત્રણ રહિત સિસ્ટમનો ફાયદો ઉઠાવીને OTT પ્લેટફોર્મ્સ ઉપર એડલ્ટ અને સેક્સબેસ્ડ મુવીઝ અને TV શોઝનો રાફડો ફાટ્યો છે. એવામાં કોવિડ 19ના લોકડાઉન સમયમાં આ કન્ટેન્ટની વ્યુઅરશિપમાં ધરખમ વધારો થયો છે.
અહેવાલો પ્રમાણે MX Player ઉપર સ્ટ્રીમ થતી 'મસ્તરામ'ને જુલાઈમાં એક જ દિવસમાં જંગી 11 મિલિયન વ્યૂઝ મળ્યા હતા. એકતા કપૂરની ALTBalaji જે તેની 18+ ફિલ્મો અને સિરિયલ્સ માટે જાણીતી છે ત્યાં ગયા વર્ષ કરતા 60% વ્યૂઅરશીપમાં વધારો થયો છે જેમાં રાગિણી MMS રિટર્ન્સ દર્શકોમાં સૌથી વધુ પોપ્યુલર છે. ગયા અઠવાડિયે નેટફ્લિક્સ ઉપર મુકાયેલી Fatal Affairs એક અઠવાડિયાની સૌથી વધુ જોવાયેલી ફિલ્મ હતી જેણે ચાર્લિઝ થેરોનની The Old Guard ફિલ્મને પાછળ મૂકી દીધી હતી.
એક પછી એક સીઝન ધરાવતી TV સિરીઝ વિષે વાત કરવામાં આવે તો મિર્ઝાપુર (એમેઝોન પ્રાઈમ), Sacred Games (નેટફ્લિક્સ) જે બંને હિંસા અને ગાળાગાળી ધરાવતા ડાયલોગ્સ માટે જાણીતી છે તેઓ ટોચની વ્યૂઅરશિપ ધરાવે છે. આ ઉપરાંત એમેઝોન પ્રાઈમ ઉપરની સેક્સ કોમેડી 'રસભરી' પણ ખૂબ ઊંચી વ્યુઅરશીપ ધરાવે છે.
આ છે વ્યુઅરશીપમાં વધારા પાછળનું કારણ
નોંધનીય છે કે ભારતમાં મોટાભાગની પોર્ન સાઇટ્સ ઉપર પ્રતિબંધ છે અને Ullu જેવા વેબ પોર્ટલ ઉપર જયારે આ કન્ટેન્ટ સ્ટ્રીમ થાય ત્યારે સૌને ઇંતેજારી રહે છે. આ ઉપરાંત સ્માર્ટફોન્સના ઉપયોગના વધારાથી પોતાની અનુકૂળતાએ દર્શકો આ ફિલ્મો જોઈ શકે છે. મહત્વનું છે કે અત્યારે કોરોનાના પગલે લોકો ઘરે વધુ સમય વિતાવે છે જેથી આવું કન્ટેન્ટ જોવામાં વધારો થયો છે.
નાના નગરોમાં આ કન્ટેન્ટની વ્યુઅરશિપ વધારે છે
નોંધનીય છે કે દેશમાં OTT પ્લેટફોર્મના દર્શકોમાં પુરુષ અને મહિલાનો ગુણોત્તર 65:35 છે. આ કારણોસર અત્યારે ઉત્તેજક કન્ટેન્ટ માટે બધા પુરુષોને કુતુહલ છે પણ નિષ્ણાતોનું માનવું છે કે આ રસ થોડા સમયમાં વધુ પડતું કન્ટેન્ટ બનવાથી ઓછો થઇ જશે. આ ઉપરાંત આ કન્ટેન્ટ મેટ્રો સિટીઝ કરતા દેશના નાના નગરો અને શહેરોમાં ખાસ કરીને ઉત્તરપ્રદેશ, મધ્યપ્રદેશ, રાજસ્થાન જેવા રાજ્યોના ગામોમાં વધારે પોપ્યુલર છે કારણ કે અહીંના લોકો વિદેશની પોર્ન ફિલ્મો કે એરોટીક કન્ટેન્ટ જોવા ટેવાયેલા નથી. આ જ દર્શકોને ટાર્ગેટ કરીને બનાવવામાં આવેલા શોઝ જેવા કે 'ગંદી બાત', 'મસ્તરામ' વગેરે શોઝને ખૂબ સારો પ્રતિસાદ સાંપડ્યો છે. આ એવા દર્શકો છે કે જે વાસ્તવિક જીવનમાં પાત્ર સાથે ડેટિંગ કે સેક્સ નથી માણી શકતા તેથી તેઓ આ કન્ટેન્ટ જુએ છે.
ભવિષ્યમાં આ કન્ટેન્ટ ઉપર સેન્સરશીપ લાગી શકે છે
નિષ્ણાતોના મતે OTT પ્લેટફોર્મ ઉપર હવે સ્થાનિક ભાષામાં બનતા શોઝ તેનું ભવિષ્ય છે. સેક્સ્યુઅલ કન્ટેન્ટને ભવિષ્યમાં પણ આટલો જ પ્રતિસાદ મળતો રહેશે પરંતુ ભારત સરકાર ભવિષ્યમાં આ પ્લેટફોર્મ્સ ઉપર કોઈ પ્રકારની સેન્સરશીપ લાદી શકે તેવી સંભાવના છે. ત્યાં સુધી આ કન્ટેન્ટ બનતું રહેશે કારણ કે વધારે વ્યુ મળવા ઉપરાંત તેના પ્રોડક્શનમાં વધુ ખર્ચ થતો નથી કારણ કે તેના શૂટિંગ માટે મોટા સ્ટાર્સ કે ફેન્સી લોકેશન્સની જરૂર પડતી નથી.