ભારે વરસાદ / VIDEO: ક્યાં ગયું સંવેદનશીલ તંત્ર? અમદાવાદમાં ઘૂટણસમા પાણીમાં દર્દીને જુઓ કઈ રીતે લઈ જવા પડ્યા

• અમદાવાદમાં ભારે વરસાદને કારણે પાલડીની સોસાયટીમાં પાણી ભરાયા  
• એમ્બ્યુલન્સ વાન દર્દીને લઈ જવા મુશ્કેલી, સ્ટેચર પર દર્દીને ચાલતા લઈ જવા પડ્યા 
• સોસાયટીમાં પાણી ભરાતા લોકોને હાલાકી, ભારે અવ્યવસ્થાથી જનતા ત્રાહિમામ

અમદાવાદમાં ગઈકાલે આવેલા ભારે વરસાદને કારણે અનેક મુશ્કેલીઓ સર્જાઇ છે. અમદાવાદમાં વરસાદી પાણી ભરાતા અફરાતફરીનો માહોલ જોવા મળી રહ્યો છે. આ દરમ્યાન પાલડી વિસ્તારની એક સોસાયટીમાં વરસાદી પાણી ભરાઈ જતાં એમ્બ્યુલન્સ વાનમાં દર્દીને લઈ જવા માટે પરેશાની ઊભી થઈ હતી. જે બાદમાં સ્ટેચર પર દર્દીને ચાલતા લઈ જવા પડ્યા હતા. 

વરસાદે AMCના પ્રિમોન્સુન પ્લાનની પોલ ખોલી

અમદાવાદમાં આખી રાત વરસેલા વરસાદે AMCના પ્રિમોન્સુન પ્લાનની પોલ ખોલી નાખી. પ્રથમ વરસાદમાં જ અમદાવાદના અનેક વિસ્તારો જળમગ્ન થઇ ગયા. શહેરના પૂર્વ અને પશ્ચિમ બંને વિસ્તારોમાં ઠેર-ઠેર પાણી ફરી વળતા સવાર-સવારમાં જ લોકોએ ભારે હાલાંકીનો સામનો કરવો પડ્યો છે. 

પાલડીમાં પાણી ભરાઈ જતાં દર્દીને સ્ટેચર પર ચાલતા લઈ જવા પડ્યા

ગઇકાલે રાત્રે અમદાવાદમાં આવેલા ભારે વરસાદને કારણે પાલડી વિસ્તારમાં પણ પાણી ભરાયા હતા. આ દરમ્યાન પાલડી વિસ્તારની સોસાયટીમાં પાણી ભરાયાની ઘટના સામે આવી હતી. જ્યાં એક દર્દીને એમ્બ્યુલન્સ વાનમાં લઈ જવા માટે ભારે પરેશાની ઊભી થઈ હતી. જે બાદમાં સ્ટેચર પર દર્દીને ચાલતા લઈ જવા પડ્યા હોવાના દ્રશ્યો સામે આવ્યા છે. અમદાવાદમાં આવેલા વરસાદને કારણે ભારે અવ્યવસ્થાથી જનતા ત્રાહિમામ પોકારી ઉઠી છે. 

અમદાવાદમાં ભારે વરસાદ 

અમદાવાદમાં આવેલા વરસાદને કારણે શહેરના નિકોલ, નરોડા, કૃષ્ણનગર, ઓઢવ, રખિયાલ, હાટકેશ્વર, ઈસનપુર અને અજીત મીલ વિસ્તારો જળમગ્ન થઇ ગયા છે. એ સિવાય શહેરના અન્ય વિસ્તારોમાં મણિનગર, જજીસ બંગલો, રાણીપ, મીઠાખળી, બોપલ, ઘુમા, ગોતા, ચાંદલોડિયાઅને પરિમલ અંડરપાસમાં પાણી ભરાઇ જતા વાહનચાલકોએ સવાર-સવારમાં નોકરીએ ફરી-ફરીને જવાના દહાડા આવ્યા. 

અમદાવાદમાં પણ ભારે વરસાદને કારણે શહેરની તમામ સ્કૂલો આજે બંધ 

અમદાવાદમાં 4.5 ઈંચ વરસાદ પડતાં શહેર જળમગ્ન બન્યું હતું, જેને લઈ હવે શહેરની તમામ સ્કૂલો સોમવારે (11 જુલાઇ)એ બંધ રાખવાનો નિર્ણય કરવામાં આવ્યો છે. ભારે વરસાદને કારણે પાણી ભરાતા DEOએ આ નિર્ણય લીધો હોવાનું સામે આવ્યું છે. 

ભારેથી સામાન્ય વરસાદ વરસવાની આગાહી

અમદાવાદની સહિત મધ્ય ગુજરાતમાં ભારે વરસાદ વરસતા જનજીવન અસ્તવ્યસ્ત થઇ ગયું છે. ત્યારે સંકટ હજુ ટળ્યું નથી. કારણ કે આજે પણ રાજ્યનાં મોટા ભાગના વિસ્તારોમાં ભારેથી સામાન્ય વરસાદ વરસવાની આગાહી કરવામાં આવી છે.