સુરત ખાતે શાક માર્કેટમાં ખુલ્લે આમ દારૂનું વેચાણ થયું હોવાનો વિડિયો વાયરલ થયો છે.
સુરતમાં હવે શાકભાજી માર્કેટમાં પણ દારૂ વેચાતો થયો
દેશી દારૂનું ખુલ્લેઆમ વેચાણ
પોલીસતંત્ર નિષ્ક્રિય હોવાનો આરોપ
ગુજરાતમાં કહેવાતી દારૂબંધી વચ્ચે ખુલ્લે આમ દારૂ વહેચાઈ રહ્યો છે અને પીવાઇ પણ રહ્યો છે. તેવા અનેક વખત આરોપો લગાવાયા છે. વારંવાર દારૂના મસમોટા જથ્થાનો પર્દાફાસ થાય છે જે દારૂબંધી કાગળ પર જ રહી હોવાની ચાડી ખાઈ રહી છે. તેવા સંજોગો વચ્ચે સુરતમાં શાકમાર્કેટમાં દારૂ વેચાતો હોવાનો વીડિયો વાયરલ થતાં ચર્ચા જાગી છે. બીજી બાજુ પોલીસની કામગીરી પણ શંકાના દાયરામાં આવી છે.
સુરતના પાલનપુર જકાતનાકા વિસ્તારમાં વેચાઈ રહ્યો છે દારુ
સુરત જિલ્લામાં દારૂ અને ગાંજા સહિતના નશીલા પદાર્થોનું દૂષણ દિવસેને દિવસે વકરી રહ્યું હોવાની લોકોમાંથી રાવ ઉઠી રહી છે. તેવામાં આજે સુરત શહેરના પાલનપુર જકાતનાકા વિસ્તારનો વિડીયો સોશિયલ મીડિયામાં વાયરલ થયો છે. પાલનપુર જકાતનાક શાકમાર્કેટમાં શાકની લારીની બાજુમાં દેશી દારૂનું ખુલ્લેઆમ વેચાણ થતું હોવાનું સામે આવતા ચર્ચા જાગી છે. નશાનું દૂષણ વકાર્યું હોવાની ફરિયાદો વચ્ચે પોલીસ તંત્ર કુંભકર્ણની નિંદ્રામાં ઊંઘતું હોવાની પણ સ્થાનિકો રાવ કરી રહ્યા છે. આજુ બાજુના વિસ્તારવાસીઓ દ્વારા પોલીસને આ મામલે ફરિયાદ કરવામાં આવતી હોવા છતાં પોલીસે ફરિયાદને કચરા ટોપલીમાં પધરાવી દઈ કોઇ પગલાં ન લીધા હોવાના પણ સ્થાનિકો આક્ષેપો લગાવી રહ્યા છે.
તાજેતરમાં સુરત નજીક ટ્રકમાંથી ઝડપાયો 701 કિલો ગાંજો
તાજેતરમાં જ સુરત એસઓજીએ મસમોટા નશાના કાળા કારોબારનો પર્દાફાસ કર્યો હતો. પોલીસે સુરત જિલ્લાના કામરેજના ઉંભેર ગામે મુંબઈ હાઇવે તરફ જતી ટ્રક હોટલ મહાદેવના પાર્કિંગમાં ઉભી હતી તે સમયે ટ્રકની SOG પોલીસે તલાસી લીધી હતી. જેમાંથી આશરે 701 કિલો ગાંજાનો જથ્થો ઝડપાયો હતો. પોલીસે આશરે રૂ.70 લાખની કિંમતનો ગાંજાનો જથ્થો જપ્ત કર્યો હતો. જેના ગણતરીના દિવસો બાદ જ ફરી દારૂનો વિડીયો વહેતો થતાં આરોપીઓને જાણે પોલીસનો કોઇ ડર ન હોય અને સુરતનું યુવાધન નશાના રાવડે ચડી રહ્યું હોવાના આ બોલતા પુરાવા સમાન સાબિત થાય છે.