અમદાવાદ / 'દમ મારો દમ' ગીત પર ઝૂમી ઊઠ્યા ભાજપના નેતાઓ, કોરોના કાળમાં 'હમ સબકી પરવાહ કરે ક્યો'?નો વીડિયો વાયરલ

• ભાજપના નેતાઓના ડાન્સનો વીડિયો વાયરલ
• દરિયાપુર વિધાનસભા બેઠકના પ્રશિક્ષણ વર્ગ રદ
• પ્રશિક્ષણ વર્ગ રદ થતા નેતાઓ ઝૂમી ઉઠ્યા

ગુજરાત રાજ્યમાં કોરોનાનો કહેર વધી રહ્યો છે. રાજ્યના કોરોના કેસોમાં મોટો ઉછાળો જોવા મળ્યો છે ત્યારે સત્તાધારી પક્ષ ભાજપની ઘોર બેદરકારી પણ સામે આવી છે. ભાજપ દ્વારા દરિયાપુર પ્રશિક્ષણ વર્ગ કાર્યક્રમનું આયોજન કરવામાં આવ્યું હતું પણ ભાજપનો પ્રશિક્ષણ વર્ગ રદ થતા નેતાઓ ઝૂમી ઉઠ્યા હતા. અહી સવાલ એ થાય છે કે કોરોના વકરતા આ  પ્રશિક્ષણ વર્ગ રદ્દ કરવામાં આવ્યો હતો પણ અહી તો નિયમો નેતાઑ ખિસ્સામાં રાખતા હોય તેમ ગીત પર ઠુમકા મારવામાં આવી રહ્યા હતા. 

હમ સબકી પરવાહ કરે ક્યો, હમને દુનિયા સે લીયા ક્યા
સરકાર કોરોનાને નાથવા માટે રણનીતિ બનાવે છે પરંતુ પક્ષના જ કાર્યકરો નિયમોની અનદેખી કરતા નજરે ચઢે છે.અમદાવાદની દરિયાપુર વિધાનસભા બેઠકમાં ભાજપનો પ્રશિક્ષણ વર્ગ રદ કરવામાં આવ્યો હતો પણ આયોજન એળે ન જાય એ માટે ત્યાં હાજર નેતાઓએ પ્રશિક્ષણ વર્ગમાં `દમ મારો દમ' ગીત ઉપર ડાન્સ કરી કોરોનાના નિયમોનો પાઠ ભૂલી ગયા હતા. શહેર ભાજપ મહામંત્રી સહિતના નેતાઓ ઠુમકા મારતા જોવા મળ્યા હતા તેમાં મહિલા નેતાઓએ સમર્થન કર્યું હતુ. ગીતના ઉન્માદમાં કોરોના નિયમો નેવે મૂકી માસ્ક પહેર્યા વગર નાચી રહેલો આ વીડીયો આંગળી ચીંધી રહ્યો છે કે આ ભૂલ કોઈ સામાન્ય નાગરિકોએ કરી હોત તો પોલીસે તાત્કાલિક કાર્યવાહી કરી નિયમોનું ભાન કરાવ્યું હોત. પણ અહી તો ભાજપના કાર્યકરો નિયમોને ખિસ્સામાં રાખી એકબીજાની તાળીઓ લઈ રહ્યા હતા હવે પ્રશ્ન એ છે કે કાર્યવાહી થાય છે કે પછી આ વખત પણ નેતાઓને છુટોદોર આપી દેવાશે તે જોવું રહ્યું. 

સળગતા સવાલો

• કેમ એક પણ નેતાએ માસ્ક નથી પહેર્યું? શું નિયમો ખિસ્સા રાખી ઝૂમો છો?
• રાજકીય પક્ષના કાર્યકરો શા માટે વારંવાર કરે છે નિયમોનો ભંગ?
• રાજકીય કાર્યકરો સામે કેમ નથી થતી કાર્યવાહી?
• પાર્ટી સત્તામાં હોય કે ન હોય કાર્યકરો શા માટે કરી રહ્યા છે નિયમોની અનદેખી?
• રાજકીય પાર્ટીના કાર્યકરો હોવાથી તેમની સામે નથી થતી કાર્યવાહી?
• રાજકીય કાર્યકરો થકી કોરોનાના કેસો વધે તો જવાબદારી કોની?
• સામાન્ય પ્રજાને દંડતી સરકાર રાજકીય પાર્ટીના કાર્યકરોને કરશે દંડીત?
• સરકાર પક્ષના કે વિપક્ષના કાર્યકરો કેમ નથી પાળતા નિયમો?

પ્રદેશ હોદ્દેદારો દ્વારા કડક શબ્દોમાં ઠપકો આપવા આવ્યો છે: કસવાલા
અમદાવાદ શહેર ભાજપના પ્રશિક્ષણ શિબિરના વાયરલ વીડિયો મામલે ભાજપનાં સંગઠનમંત્રી મહેશ કસવાલા નિવેદન આપ્યું. તેઓએ કહ્યું કે અભ્યાસ વર્ગમાં આ પ્રકારના ગીતો ડાન્સએ યોગ્ય નથી. અને કોરોના ગાઈડલાઇનનું ઉલ્લંઘન કરવામાં આવ્યું છે. ત્યારે પ્રદેશ હોદ્દેદારો દ્વારા કડક શબ્દોમાં ઠપકો આપવામાં આવ્યો છે. અમદાવાદની દરિયાપુર વિધાનસભા બેઠકનો પ્રશિક્ષણ વર્ગ રદ થતા નેતાઓ ઝૂમી ઉઠ્યા હતા. અને નેતાઓએ હિન્દી ફિલ્મના ગીતો પર ડાન્સ કર્યો હતો. જેનો વીડિયો વાયરલ થયો છે.