પોલીસનાં F ડીવીઝનમાં એક બુટલેગર પાસેથી 'હફતો'ઉઘરાવતા ત્રણ પોલીસ જવાનોનો વિડીયો વાયરલ થતા પોલીસ બેડામાં ખળભળાટ મચી ગયો છે. દારૂનો ગેરકાયદે ધંધો કરતી મહિલા પાસેથી નાણા ઉઘરાવ્યા
વડોદરાના દંતેશ્વરમાં પોલીસ જવાનોનો વિડીયો વાયરલ
દારૂના ધંધાના બદલામાં હપ્તો ઉઘરાવતા હોવાનો આરોપ
પોલીસ બેડામાં ખળભળાટ; ત્રણેય જવાનોની પૂછ પરછ
વડોદરામાં કોઈ પણ પ્રકારના ભય વગર દારૂના અડ્ડા ખુલ્લે આમ ધમધમી રહ્યા છે. શહેર પોલીસનાં F ડીવીઝનમાં એક બુટલેગર પાસેથી 'હફતો'ઉઘરાવતા ત્રણ પોલીસ જવાનોનો વિડીયો વાયરલ થતા પોલીસ બેડામાં ખળભળાટ મચી ગયો છે. દારૂનો ગેરકાયદે ધંધો કરતી મહિલા પાસેથી 'D'સ્ટાફના ત્રણ જવાનો રીતસર નાણા લેતા કેમેરામાં કેદ થયા છે. આ અંગે પોલીસ તપાસ ચાલી રહી છે.
સ્થાનિકોની ફરિયાદ નથી લેવાતી ધ્યાને
વડોદરાના દારૂની દૂષણ બેહદ વ્યાપી ગયું છે. કહેવાય છે કે, પોલીસની રહેમ નજર તળે ચાલતા દારૂના અડ્ડાઓ પર ખુદ પોલીસ વિભાગના માણસો પૈસા લઈને 'ધંધા'પ્રત્યે આંખ આડા કાન કરે છે.વડોદરાના દંતેશ્વર ગામમાં સ્થાનિક નાગરિકોને દારૂના દૂષણ અંગેની ફરિયાદ પછી પણ ઉચ્ચ સ્તરે કાર્યવાહી થઇ નહોતી.એવામાં જ ત્રણ પોલીસ જવાનો,મહિલા ધંધાર્થી પાસે આવી પૈસા લઇ રહ્યા હોવાનો વિડીયો સ્થાનિક લોકોએ ઉતારી વાયરલ કરીં નાખ્યો. સ્થાનિકોનો પોલીસ વિભાગ પર આરોપ છે કે, પોલીસ વિભાગ જ ગેરકાયદે દારૂના વેચાણ બદલ પૈસા લઇ લે છે અને સ્થાનિક નાગરિકોએ આ બધું ચૂપચાપ સહન કરવું પડે છે. ઉછ સ્તરે ફરિયાદ છતાં,કોઈ ઉકેલ આવતો નથી.
પોલીસે શરુ કરી તપાસ
શહેરના F ડીવીઝન અંતર્ગત આવતા દંતેશ્વરની આ ઘટનાએ પોલીસ બેડામાં ચકચાર જગાવી છે. સ્થાનિક પોલીસ ઈન્સ્પેકટરે,વિડીયોમાં દેખાતા ત્રણ જવાનોની પૂછ પરછ પણ કરી છે. આ અગાઉ આ જ પોલીસ મથક વિસ્તારમાં આવેલા માંજલપૂરમાં ગત દિવસોમાં વિદેશી દારુ ભરેલું એક આખું ગોડાઉન ઝડપાતા ચકચાર મચી ગઈ હતી, અને સ્થાનિક PIની તાત્કાલિક અસરથી બદલી પણ કરી દેવામાં આવી હતી. હવે નવા આવેલા PIના હાથમાં દંતેશ્વર વિસ્તારની આ ઘટના આવી છે.જેની તપાસ ચાલી રહી છે.