શ્રીલંકામાં દેશ મોંઘવારીથી કંટાળેલી પ્રજાએ શાસકો વિરુદ્ધ અવાજ ઉઠાવવાનું શરૂ કરી દેતા રાષ્ટ્રપતિ રીતસરના બિસ્તરા-પોટલા લઈને ભાગતા દેખાયા હતા.
શ્રીલંકામાં જનતાનો આક્રોશ
ગુસ્સે ભરાયેલા લોકોએ રાષ્ટ્રપતિ આવાસ પર કબ્જો કર્યો
રાષ્ટ્રપતિ બિસ્તરાં-પોટલા લઈને ભાગતા દેખાયા
શ્રીલંકાના રાષ્ટ્રપતિ ગોટબાયા રાજપક્ષે શનિવારે પોતાના સત્તાવાર નિવાસેથી ભાગ્યા હતા. તેમના રાજીનામાની માગને લઈને મોટી સંખ્યામાં પ્રદર્શનકારીઓ શનિવારે કોલંબોમાં મોટી સુરક્ષાવાળા ફોર્ટ વિસ્તારમાં તમામ બંધનો તોડીને રાષ્ટ્રપતિના સત્તાવારા નિવાસ સ્થાનની અંદર ઘૂસી ગયા હતા. રાષ્ટ્રપતિને ત્યાંથી હટવું પડ્યું અને કોઈ બીજી જગ્યાએ લઈ જવા પડ્યા હતા.
આ તમામની વચ્ચે શ્રીલંકાઈ નૌસેનાના જહાજ પર સૂટકેસ લોડ કરતા હોવાનો વીડિયો સામે આવ્યો છે. જેને લઈને સ્થાનિક મીડિયાએ દાવો કર્યો છે કે સૂટકેસ રાષ્ટ્રપતિ રાજપક્ષેના હતા. વીડિયોમાં એસએલએનએસ ગજબાહૂ જહાજ પર મોટા સૂટકેસ લઈ જતાં ત્રણ લોકો દેખાય છે. ત્રણેય લોકો ખૂબ જ ઉતાવળમાં છે અને વીડિયોમાં તેમને ભાગતા જોઈ શકાય છે.
તો વળી સૂત્રો દ્વારા જાણવા મળ્યું છે કે, 8 જૂલાઈની રાતે રાષ્ટ્રપતિને સેનાના હેડક્વાર્ટરમાં શિફ્ટ કરવામાં આવ્યા હતા. આ અગાઉ પણ એક દાવો કરવામાં આવ્યો હતો કે, મુખ્ય ઈન્ટરનેશનલ એરપોર્ટ પર રાષ્ટ્રપતિના વાહનનો કાફલો હોય તેવું પણ દેખાતું હતું. જો કે, આ વાતની કોઈ પુષ્ટિ થઈ નથી કે, તેમણે દેશ છોડી દીધો છે કે નહીં.