શહેરના નિકોલ વિસ્તારની એક ચોંકાવનારી ઘટના સામે આવી છે. નિકોલ વિસ્તારમાં રહેતી અને કોલેજમાં અભ્યાસ કરતી એક યુવતીને એક યુવકે મોબાઈલમાં બીભત્સ ફોટા મોકલીને તું વીડિયોકોલ નહીં ઉપાડે તો મોકલેલા ફોટા ફેસબુકમાં વાઇરલ કરીને બદનામ કરવાની ધમકી આપવા અંગેની ફરિયાદ નિકોલ પોલીસ સ્ટેશનમાં નોંધાઈ છે.
પોલીસે આ અંગે ગુનો નોંધી આરોપીને ઝડપવાની તજવીજ હાથ ધરી છે. પોલીસસૂત્રો પાસેથી મળતી માહિતી મુજબ નિકોલ વિસ્તારમાં એક યુવતી પરિવાર સાથે રહે છે અને તે રાયપુર ખાતે આવેલી એમપી એન્ડ એમએસ આર્ટ્સ વુમન કોલેજના બીજા વર્ષમાં અભ્યાસ કરે છે. ફરિયાદમાં કરાયેલા આક્ષેપ પ્રમાણે યુવતી પાસે મોબાઈલ છે.
બે દિવસ પહેલાં કોલેજમાં રજા હોવાથી તે ઘરે હતી તે સમયે સાંજના છ વાગ્યાની આસપાસ એક અજાણ્યા યુવકે તેન ફોન કર્યો હતો. યુવતીએ ફોન ઉપાડતાં યુવકે તેની સાથે હિન્દીમાં વાતચીત કરતાં કહ્યું કે તારા વોટ્સએપમાં મેં ફોટા મોકલેલા છે તે જોઈ લે અને હું વીડિયો કોલ કરું છું તે ઉપાડ.
યુવકે આમ કહેતાં યુવતીએ વીડિયો કોલ નહીં ઉપડું તેમ કહેતાં તેણે યુવતીને ધમકી આપી હતી કે જો તું મારો વીડિયો કોલ નહીં ઉપાડે તો તારા ફોનમાં મેં મોકલેલા ફોટા હું ફેસબુકમાં અપલોડ કરી તને બદનામ કરી દઇશ.
ત્યારબાદ યુવતીએ તેના મોબાઈલમાં ફોનમાં યુવકે મોકલેેલા ફોટા જોયા તો તે બીભત્સ હતા. આથી યુવતીએ મોબાઈલ બંધ કરી દીધો હતો, જોકે યુવક અવારનવાર યુવતીના મોબાઈલ પર ફોન કરીને તેને હેરાન કરતો હતો, જેથી યુવતીએ ફોન કરનાર યુવકની તપાસ કરતાં તે મોતીલાલ નામનો શખ્સ ગમાઈબારી, શિબિર, ટેિલયામુરા, િત્રપુરાનો હોવાનું જાણવા મળ્યું હતું.
આ યુવક યુવતીને બદનામ કરી દેવાની પણ ધમકી આપતો હતો. વારંવાર થતી આ રીતની હેરાનગતિથી યુવતીએ કંટાળી નિકોલ પોલીસ સ્ટેશનમાં મોતીલાલ વિરુદ્ધ ફરિયાદ નોંધાવી હતી, જે મામલે નિકોલ પોલીસે ગુનો નોંધી તપાસ હાથ ધરી છે.