રાજ્યમાં લોકસભાની ચૂંટણીને હવે ગણતરીના દિવસો બાકી રહ્યા છે. એવામાં કુંવરજી બાવળિયાનો વીડિયો વાયરલ થયો છે, જેમાં બાવળિયાએ કહ્યું કે, વિધાનસભાની ચૂંટણીમાં તમે મને 45 ટકા મત આપ્યા. જો મત આપ્યો હોત તો તમારા ગામમાં વિકાસ થયો હતો. જે વીડિયોને લઇ હવે કુંવરજી બાવળિયાએ પ્રતિક્રિયા આપી છે.
જસદણના કનેસરાના વાયરલ વીડિયો મામલે કુવરજી બાવળિયાએ પ્રતિક્રિયા આપી છે. કુંવરજી બાવળિયાએ જણાવ્યું કે, જસદણના કનેસરા ગામમાં અમારી મિટિંગ હતી, જ્યાં મહિલાઓએ પીવાના પાણીને લઈને રજૂઆત કરી હતી. જે ગ્રામ પંચાયતનો પ્રશ્ન હોવા છતા અમે તેમની રજૂઆત સાંભળી હતી.
વધુમાં બાવળિયાએ જણાવ્યું કે, જે વીડિયો વાયરલ થઇ રહ્યો છે. એ વીડિયોમાં કોઈ ધમકીની વાત નથી. તો આ વીડિયો મામલે ભરત બોઘરાએ પણ આપી પ્રતિક્રિયા છે. ભરત બોઘરાએ કહ્યું કે, મહિલાઓએ પાણી પ્રશ્ને મંત્રી બાવળિયાને રજૂઆત કરી હતી. કોંગ્રેસના મિત્રો ધમકીના નામે વીડિયો વાયરલ કરી રહ્યાં છે.
તમને જણાવી દઇએ કે, રાજકોટના એક ગામમાં મંત્રી કુંવરજી બાવળિયાનો વીડિયો વાયરલ થયો છે. જેમાં સ્થાનિક લોકોએ બાવળિયા અને ભરત બોઘરાનો ઉધડો લીધો છે. કુંવરજી બાવળિયા સાથે ભરત બોઘરા પણ હાજર હતા. તે સમયે સ્થાનિકોએ પાણી મામલે બાવળિયાનો વિરોધ નોંધાવ્યો છે.
આ વીડિયો જસદણના કનેસરા ગામનો હોવાની શક્યતા છે. જ્યાં ગ્રામજનોએ બાવળિયાનો ઉધડો લેતા બાવળિયાએ કહ્યું કે, વિધાનસભાની ચૂંટણીમાં તમે મને 45 ટકા મત આપ્યા. જો મત આપ્યો હોત તો તમારા ગામમાં વિકાસ થયો હતો. તો બોઘરાએ જણાવ્યું કે, તમારા ગામની ખટપટના કારણે વિકાસ નથી થતો. મહત્વનું છે કે લોકસભા ચૂંટણી પહેલા ગ્રામજનોએ કુંવરજી બાવળિયાનો વિરોધ નોંધાવ્યો હતો.