નવસારી / આરક સિસોદ્રા ગામના મહિલા સરપંચના પતિની દખલગીરી તો જુઓ, પોતાને જ માને છે ગામઘણી, વિરોધ છતાંય ટસના મસ નહીં

• નવસારીમાં મહિલા સરપંચના પતિનો વીડિયો વાયરલ
• આરક સિસોદ્રા ગામના મહિલા સરપંચના પતિનો વીડિયો વાયરલ
• ગ્રામ લોકોએ વિરોધ કરવા છતાં ટસના મસ નથી થતા

મહિલા સરપંચના પતિ પોતાને ગણાવી રહ્યાં છે સરપંચ
નવસારીમાં મહિલા સરપંચના પતિનો વીડિયો સોશિયલ મીડિયામાં વાયરલ થયો છે. આરક સિસોદ્રા ગામના મહિલા સરપંચના પતિના વાયરલ વિડીયોમાં મહિલા સરપંચના પતિ ભાસ્કર રાઠોડ પોતાને સરપંચ ગણાવી રહ્યાં છે અને પંચાયતની કામગીરીમાં પણ સરપંચના પતિ દખલગીરી કરી રહ્યાં હોવાની રાવ ઉઠી રહી છે. સાથે જ ગ્રામ લોકોએ વિરોધ કરવા છતાં પણ મહિલા સરપંચના પતિને કોઈનો પણ ડર ના હોય એવુ  વર્તન કરી રહ્યા છે. 

ગ્રામજનો દ્વારા તલાટીને રજૂઆત કરાઇ 
આરક સિસોદ્રા ગામના સરપંચ પદના અભરખા રાખતા ભાસ્કર રાઠોડની કામગીરી સામે લોકોમાં રોષ જોવા મળી રહ્યો છે. મહિલા સરપંચ પતિ ગામના સરપંચની કામગીરીમાં છાશવારે ચંચુપાત કરી રહ્યા છે જેથી ગ્રામજનોમાં પણ વિરોધનો સૂર ઉઠ્યો છે. છતાં મહિલા સરપંચ પતિ લોકોના વિરોધને ગણકારતા ન હોવાની સ્થાનિકોમાંથી રાવ ઉઠી રહી છે. આથી કાયદેસરની કાર્યવાહીની માંગ સાથે ગ્રામજનોએ એકઠા થઈ તલાટીને પણ રજૂઆત કરી છે. એક બાજુ મહિલા સશક્તિકરણનીઓ મોટી મોટી વાતો કરવામાં આવે છે. જ્યારે બીજી બાજુ અમુક તત્વોને પદનો મોહ છુટતો ન હોવાથી મહિલા સશક્તિકરણની દિશામાં ધારી સફળતા સાંપડી ન હોવાના આવા કિસ્સાઓ હજરાહજુર પુરાવા સમાન સાબિત થયા છે. 

ત્યારે ગ્રામ લોકોના આકરા વિરોધ કરવા છતાં ટસના મસ ન થતા ભાસ્કર રાઠોડ સામે ઉચ્ચકક્ષાએથી કડક પગલાં લેવામાં આવશે કે ભીનું સંકેલી લેવામાં આવશે? એ તો આવનાર સમય જ બતાવશે.

જે મહિલા ચૂંટાયા છે વહીવટ પણ તેમના દ્વારા જ થવો જોઈએ: pm 
નોંધનીય છે કે ગત માર્ચ માસમાં વડાપ્રધાન નરેન્દ્ર મોદી ગુજરાતના પ્રવાસે આવ્યા હતા. આ દરમિયાન અમદાવાદના GMDC ગ્રાઉન્ડ પર પંચાયત મહાસંમેલનનું સંબોધન કર્યું હતું. જેમાં મહિલા સશક્તિકરણને પ્રોત્સાહન આપવા તેઓએ જણાવ્યુ હતું કે મહિલાઓ પુરુષની સમોવડી છે. આથી ગામમાં જો કોઈ મહિલા સરપંચ તરીકે ચૂંટાયા હોય તો ગામનો તમામ વહીવટ મહિલા પોતે જ ચલાવે તેવી વડાપ્રધાને ટકોર કરી હતી. પીએમે કહ્યું હતું કે sp (સરપંચ પતિ) તરીકેનો વહીવટ ગુજરાતમાં ન ચાલવો જોઈએ. જે મહિલા ચૂંટાયા છે વહીવટ પણ તેમના દ્વારા જ થવો જોઈએ.