ગુજરાત વિધાનસભાની ચૂંટણીના ધમધમાટ વચ્ચે સાવરકુંડલા કોંગ્રેસના ઉમેદવાર પ્રતાપ દૂધાતનો વીડિયો વાયરલ થયો છે. જેમાં તેઓ પોલીસ અધિકારીનું નામ લીધા વિના સભામાં ધમકી આપી રહ્યા છે.
1 તારીખ તમારી છે ને 2 તારીખ પ્રતાપ દૂધાતની છેઃ દૂધાત
ગુજરાત વિધાનસભાની ચૂંટણીને ગણતરીના દિવસો બાકી છે, ત્યારે રાજનેતાઓ દ્વારા પૂરજોશમાં પ્રચાર કરવામાં આવી રહ્યો છે. આ દરમિયાન નેતાઓના બેફામ નિવેદનો પણ સામે આવી રહ્યા છે. સાવરકુંડલા કોંગ્રેસના ઉમેદવાર પ્રતાપ દૂધાતનો જાહેરમાં પોલીસને ધમકી આપતો વીડિયો વાયરલ થયો છે. પ્રતાપ દૂધાતના આ વીડિયોથી રાજકારણમાં ગરમાવો આવ્યો છે.
પ્રતાપ દૂધાતનો વીડિયો વાયરલ
સભામાં સાવરકુંડલા કોંગ્રેસના ઉમેદવાર પ્રતાપ દૂધાતે કહ્યું કે, 'ભાજપ એજન્ટ બની કામ કરતા પોલીસ અધિકારી સાવરકુંડલા મુકાયા છે. 1 તારીખ તમારી છે અને 2 તારીખ પ્રતાપ દૂધાતની છે. જે મોટા મોટા આવે છે એના બાપુજી સામે મારી લડાઈ ચાલે છે.'
જે પોલીસ એજન્ટ બનીને કામ કરે છે એ શાનમાં સમજી જાયઃ દૂધાત
તેઓ વધુમાં કહી રહ્યા છે કે, 'જે પોલીસ અધિકારીઓ મને નુકસાન પહોંચડવાનો વિચાર કરી રહ્યા છે, જે પોલીસકર્મીઓ ભાજપના એજન્ટ બનીને કામ કરી રહ્યા છે, એ પોલીસને મીડિયા મારફતે કહેવા માંગુ છું કે શાનમાં સમજી જાજો. વણઝારાના દિવસો પણ જોયા છે. અમે કોંગ્રેસીઓ છીએ એકવાર પકડી લઈએ તો મુકતા નથી. સાબરમતીમાં પણ કેટલાય ને સડતા જોયા છે. મારા હાથમાં ધોકો આવે અને તમારી છાતી સુધી ન આવું તો પ્રતાપ દૂધાત નહીં.'
કોંગ્રેસના પ્રતાપ દૂધાતની ઓડિયો ક્લિપ થઈ હતી વાયરલ
અત્રે ઉલ્લેખનીય છે કે, આ અગાઉ સાવરકુંડલા કોંગ્રેસના ઉમેદવારની PGVCLના અધિકારી સાથેની ઓડિયો ક્લીપ વાયરલ થઈ હતી. ફોન ઉપર પ્રતાપ દૂધાતે અધિકારીને ખરાબ રીતે ખખડાવ્યા હતા. આ ઓડિયો ક્લિપ સોશિયલ મીડિયા પર વાયરલ થઈ જતા દૂધાત વાયરલના વાયરામાં આવી ગયા હતા. જો કે, અપશબ્દો કહેવા મુદ્દે પ્રતાપ દૂધાતે પોતાની ભૂલ સ્વીકારી હતી