તારને જીવંત કરવા ક્રેઈન પર લટકી કામ કરતાં કર્મીનો વીડિયો વાયરલ, સૌરાષ્ટ્રમાં NDRF અને PGVCL યુદ્ધના ધોરણે કામગીરીએ લાગ્યા
NDRF અને PGVCLની તાબળતોબ કામગીરી
ક્રેઇનની મદદથી વીજ સપ્લાય શરૂ કરતા કર્મીનો વીડિયો વાયરલ
સૌરાષ્ટ્રના જામનગર અને રાજકોટમાં વરસાદે વેર્યો વિનાશ
સૌરાષ્ટ્રમાં વરસાદે વેરેલા વિનાસ બાદ NDRF અને PGVCLની ટીમો દેવદૂત બની અસરગ્રસ્ત લોકોની જીંદગીમાં ફરી ઉજાસ લાવવા તનતોળ મહેનત કરી રહી છે. ગોંડલના ગ્રામ્ય વિસ્તારોમાં ઠેર ઠેર વીજળી ગુલ થઈ જતાં અને ગોંડલી નદીમાં આવેલ ભયાનક પુર વચ્ચે PGVCL વીજ સપ્લાય ચાલુ કરવા યુદ્ધના ધોરણે કામગીરી ચાલુ કરી છે. ક્રેઇનની મદદથી વીજ સપ્લાય શરૂ કરતા કર્મીનો વીડિયો સામે આવ્યો છે. આ વીડિયોમાં વીજળીના થાંભલા પર ચડી શકાય તેવી સ્થિતિ ન હોતા, PGVCLનો કર્મી જીવની બાજી લગાવી ધસમસતા પ્રવાહ વચ્ચે ગુલ થયેલી વીજળી ફરી ચાલુ કરવા મથી રહ્યો છે. આવા કાર્યનિષ્ઠાનો વીડિયો સાથીકર્મીએ ઉતારી વાયરલ કરતાં ગુજરાત ભરમાં PGVCL કર્મીના કામના ભરપેટ વખાણ થઈ રહ્યા છે. જુઓ વીડિયો
PGVCLને ફરી ફટકો
સૌરાષ્ટ્રમાં જ્યાં મેઘતાંડવનાં કારણે જનજીવન અસ્તવ્યસ્ત થઈ ગયું છે અને ત્યારે રાજ્યનાં વીજળી વિભાગ PGVCLને ફરી જોરદાર ફટકો પડ્યો છે. સૌરાષ્ટ્રમાં તાઉતે વાવાઝોડા દરમિયાન વીજળીનાં કેટલાય પોલ પડી ભાંગ્યા હતા જે બાદ જામનગર સહિતનાં જિલ્લાઓમાં ઘણા દિવસ સુધી વીજ વ્યવવહાર ખોરવાયો હતો. હજારો વીજ પોલ ફરીથી ઊભા કરવા માટે સરકાર દ્વારા મોટા પાયે કામ કરવામાં આવ્યું હતું ત્યારે હવે પૂરનાં કારણે સૌરાષ્ટ્રમાં 545 વીજપોલ જમીનદોસ્ત થયા છે. રાજકોટના 23 અને જામનગરના 85 ગામ સહિત 145 ગામમાં વીજળી ગુલ થઈ ગઈ છે.
NDRF ટીમો કરી રહી છે દિલ ધડક રેસ્ક્યૂ
ભારે વરસાદની આગાહીને લઇને વહીવટી તંત્ર અલર્ટ થયું છે. જુનાગઢ, ગોંડલ, ભાવનગરમાં NDRFની ટીમ સક્રિય થઇ છે. જુનાગઢના વંથલી શહેરમાં તેમજ અલગ અલગ જગ્યા પર ફસાયેલા લોકોનું રેસ્ક્યૂ કરવામાં આવ્યું છે. 2 પરિવારનું NDRFની ટીમે રેસક્યૂ કરી સલામત સ્થળે ખસેડવામાં આવ્યા છે. તો આ તરફ કુતિયાણાના ભાદરકાંઠા વિસ્તારમાં NDRFની ટીમ દ્વારા રેસ્ક્યુ કરવામાં આવ્યુ છે. ભાદર નદીના પાણી ગામમાં ઘૂસી જતા લોકો ફસાયા હતાં. તો આ તરફ ભાવનગરમાં પણ ભારે વરસાદની આગાહીને લઇને વહીવટી તંત્ર અલર્ટ થઇ છે. વડોદરાથી 25 સભ્યોની NDRFની ટીમ ભાવનગર આવી છે. હાલ તો NDRFની ટીમને ભાવનગર ખાતે સ્ટેન્ડ બાય રાખવામાં આવી છે.