ગોંડલમાં કોનું રાજ? / અનિરુદ્ધ અને જયંતી ઢોલના હાથા બની ગયા...: જયરાજસિંહે સ્ટેજ પરથી ખુલ્લેઆમ આપી ધમકી

• જાહેર સ્ટેજ પરથી જયરાજસિંહનો ધમકી આપતો વીડિયો વાયરલ 
• તમારા સરનામા વિખી ન નાખું તો હું જયરાજસિંહ નહીંઃ જાડેજા
• જયંતિ ઢોલ અને અનિરુદ્ધસિંહના હાથા બન્યા છોઃ જયરાજસિંહ

ગુજરાતમાં 15મી વિધાનસભાની ચૂંટણીના પ્રથમ તબક્કાના મતદાનને ચાર દિવસો બાકી છે. ત્યારે રાજકોટની ગોંડલ બેઠક પર બરાબરનો રાજકીય માહોલ જામ્યો છે. ગોંડલ બેઠક ફરી ચર્ચામાં આવી છે. ગોંડલ બેઠકના ભાજપના ઉમેદવારના ગીતાબા જાડેજાના પતિ જયરાજસિંહ જાડેજાનો વીડિયો વાયરલ થયો છે. જેમાં તેઓને સ્ટેજ પરથી વિરોધીઓને ખુલ્લેઆમ ધમકી આપી રહ્યા છે. 

તમારી હેસિયત શું છે? જયરાજસિંહ 
ગોંડલના પૂર્વ ધારાસભ્ય જયરાજસિંહ જાડેજાનો સ્ટેજ પરથી ધમકી આપતો વીડિયો વાયરલ થયો છે. જેમાં તેઓ કહી રહ્યા છે કે, 'આ ગામમાં આગેવાનીમાં મેં શું ઘટવા દીધું, તમારા ગામનો કાલ સવારનો છોકરો સહદેવ એને ઉપાડીને હું જિલ્લા પંચાયતમાં લઈ ગયો અને એને મેં કારોબારીનો ચેરમેન બનાવ્યો. જ્યારથી પંચાયત રાજ આવ્યું છે ત્યારથી ઘરાસિયાનો દીકરો જિલ્લા પંચાયતનો ચેરમેન પહેલીવાર બન્યો છે. એ બધું ભૂલાઈ ગયું? પહેલા તો વડીલોને મારો ઠપકો આપ્યો છે કે જ્યારે તમારા ગામમાં આવી પરિસ્થિતિનું નિર્માણ થયું ત્યારે તમે વડીલો તરીકે ભૂમિકા શું ભજવી? શું તમે એને થપકો દીધો? એને મેં ઉપાડીને જિલ્લામાં મુક્યો. મુખ્ય પોસ્ટ ઉપર મુક્યો. એવી રીતે સિદ્ધરાજને મેં ઉપાડીને તાલુકાનો ચેરમેન બનાવ્યો. જયરાજસિંહ જાડેજા સામે ટિકિટ માંગવા નીકળા હતા તમે, તમારી હેસિયત શું છે? જયરાજસિંહ જાડેજા જીવે છે ત્યાં સુધી પરિવાર સિવાય કોઈને ટિકિટ મળવાની નથી લખવું હોય ત્યાં લખી લો. જયરાજસિંહ જાડેજા ભારતીય જનતા પાર્ટીમાં ઘરડો થઈ ગયો છે અને આ લોકોએ મારા પર વિશ્વાસ રાખ્યો છે.'

1998માં જે જયરાજસિંહ હતો એજ જયરાજસિંહ આજે પણ છે: જયરાજસિંહ
જયરાજસિંહ જાડેજાએ કહ્યું કે, વડીલ તરીકેની ભૂમિકા જ્યારે ભજવવાની હોય અને જ્યારે ચૂકી જવાની હોય એ બંને વસ્તુની નોંધ છે. ગામના ક્ષત્રિય આગેવાનોએ મારી પાસે આવવું જોઈએ અને કહેવું જોઈએ કે મારા છોકરાઓની ભૂલ છે. કેમ કોઈ બોલ્યા નહીં? કેમ છાનામૂના બેઠા બધાય? બીજી વાત એ કોઈને વહેમ હોય કે હું આમ કરી નાખું, તેમ કરી નાખું તો ભૂલી જાય. 1998 જે જયરાજસિંહ જાડેજા હતો એજ જયરાજસિંહ જાડેજા છે. એમાં જરાય શંકા કોઈ રાખતા નહીં.

'હું લેઉવા પટેલ સમાજનો આભાર માનું છું'
ભલા માણસ ઘરાસિયા તરીકે મારો ભરોસો કોનો કરવો તમે વિચાર તો કરો. હું આભાર માનું છું લેઉવા પટેલ સમાજનો. એક લાખની વસ્તીનો આ લેઉવા પટેલ સમાજનો મતદાર અને એક લાખમાંથી એક લેઉવા પટેલ યુવાને મારી સામે ટિકિટ ન માંગી તમે વિચાર તો કરો. મારે કોની ખાનદાનીને બિરદાવવી, વિચાર કરો. એક લાખની વસ્તીનો લેઉવા પટેલ સમાજ છે. એમાં ભારતીય જનતા પાર્ટીએ ખાનગીમાં પૂછાવ્યું હતું કે જયરાજસિંહ જાડેજા સામે લેઉવા પટેલમાંથી કોઈને ટિકિટ જોઈએ છે? એક લાખે એક અવાજે કીધુ હતું કે અમારે ટિકિટ નથી જોઈતી જયરાજસિંહ જાડેજાને આપો, મારા માટે ભગવાન કોણ?

જાહેર સ્ટેજ પરથી જયરાજસિંહએ આપી ધમકી 
તમને ગદ્દારીનું ફળ હું ચોક્કસ આપીશ આ ચોકમાં કહું છું, તમારા સરનામા મેં બનાવ્યા ને. એ સરનામા જો વીંખી નો નાંખુ ને તો હું જયરાજસિંહ જાડેજા નઈં કહી દેજો. શરમ થાવી જોઈએ. મારે ટિકિટ જોતી છે. હવે કાલ તૂટેલા બૂટ પહેરીને આંટા મારતો હતો, ભૂલી ગયા? હું વ્યક્તિગત વાત કરું છું હો ભાઈ તમે કોઈ મારો થપકો માથે ના લઈ લેતા. હું બે નામજોગ વ્યક્તિ સાથે વાત કરું છું. ભૂલાઈ ગયુ? હાથા બની ગયા છો. કોના બન્યા છો એ નિરાંતે વિચાર કરજો. એક નંબર છે જયંતિ ઢોલ અને બીજો છે અનિરુદ્ધ. આના હાથા બન્યા ને એ હાથા કે કુહાડાને બધુ ભેગુ થઈને તમારા પગ તમે કાપ્યા છે.

ગીતાબા જયરાજસિંહ જાડેજાને રિપીટ કરાયા
આપને જણાવી દઈએ કે, ગોંડલ બેઠક પર જયરાજસિંહ જાડેજા અને રીબડાના અનિરૂધ્ધસિંહ જાડેજા વચ્ચે ટિકિટ મુદ્દે ઘમાસાણ થઈ હતી. બંને પોત-પોતાના પરિવાર માટે ભાજપમાંથી ટિકિટની માંગ કરી રહ્યા હતા. જોકે, ભાજપ દ્વારા ગોંડલ વિધાનસભા બેઠક પર ગીતાબા જયરાજસિંહ જાડેજાને રિપીટ કરાયા છે.  

છેલ્લી બે ટર્મથી ભાજપ પાસે છે ગોંડલ બેઠક
અત્રે ઉલ્લેખનીય છે કે, ગોંડલ સીટનો રાજકીય ઇતિહાસ લોહીયાળ રહ્યો છે. છેલ્લી બે ટર્મથી ગોંડલ બેઠક ભાજપ પાસે છે. ગીતાબા જયરાજસિંહ જાડેજા ગોંડલના ધારાસભ્ય છે. ગોંડલ વિધાનસભા બેઠક પર કુલ 2,28,438 મતદારો છે. જેમાં 1,18,218 પુરુષ અને 1,10,212 મહિલા મતદારો છે. 2017ની ચૂંટણી સમયે જયરાજસિંહને હત્યાના કેસમાં રાજ્યની બહાર રહેવાની શરતે જામીન મળ્યા હતા. એ કારણે ગોંડલ બેઠક પર તેમના પત્નીને ટિકિટ મળી હતી. 2017ની વિધાનસભાની ચૂંટણીમાં ગીતાબા જયરાજસિંહ જાડેજાનો વિજય થયો હતો.