લીરેલીરા / દેશી દારૂની પોટલી થઇ રહી છે તૈયાર : અમદાવાદના બુટલેગરનો VIDEO વાયરલ, પોલીસને કંઇ ખબર નથી!

• અમદાવાદમાં બેફામ દેશી દારૂનું વેચાણ!
• અમદાવાદના અમરાઇવાડીનો વીડિયો વાયરલ
• VTV વાયરલ વીડિયોનું નથી કરતું પુષ્ટી

હજુ તો બોટાદ લઠ્ઠાકાંડના પડઘા શાંત પણ થયા નથી ત્યારે ફરી ગુજરાતમાં દેશી દારૂની ભઠ્ઠીઓ ધમધમવા લાગી છે. અમદાવાદમાં દેશી દારૂના વેચાણનો વાયરલ વીડિયો પોલીસની આંખ ઉઘાડી રહ્યો છે. અમરાઇવાડીમાં પૂનમ શેઠની ચાલીમાં દેશી દારૂ થેલીમાં પેક કરતા બુટલેગરનો વીડિયો વાયરલ થયો છે. જેમાં કોઈ પણ ડર વગર પોટલીઓમાં દારૂ ભરાઈ રહ્યો છે. ગંગા નામના બુટલેગર આ દારૂનું વેચાણ કરી રહ્યો છે. સવાલએ છે કે બોટાદ લઠ્ઠાકાંડ બાદ દારૂની ભઠ્ઠીઓ પર તવાઈ બોલાવવામાં આવી હતી. પણ ઘટનાને થોડો સમય જતા ફરી એજ સ્થિતિ પોલીસની મીઠી કામગીરી અને રહેમ નજરનો પુરાવો આપી રહી છે. સમગ્ર મામલે  VTV જવાબદાર પોલીસ અધિકારીઑ સાથે પણ વાત કરવાનો પ્રયાસ કર્યો હતો પણ કઈ ખબર ન હોવાનું રટણ કર્યું હતું. જુઓ VIDEO

સળગતા સવાલ

• શું આ જ છે ગુજરાતમાં દારૂબંધી?
• શું અમદાવાદ પોલીસને આ અંગે કોઇ જાણ જ નથી?
• શું અમદાવાદ પોલીસ બીજા કેમિકલ કાંડની રાહ જુએ છે?
• પોલીસ વિભાગ દાખલારૂપ કાર્યવાહી કેમ નથી કરતું?
• શું બુટલેગર ગંગા પોલીસને હપ્તો આપે છે?
• આવા બુટલેગરો સામે કેમ કડક કાર્યવાહી નથી થતી?
• રાજ્યના લોકોને દારૂના દૂષણમાંથી ક્યારે મુક્તિ મળશે?

સરદારનગરમાં પણ બુટલેગરની ત્રાસદી
તો બીજી તરફ  અમદાવાદના સરદારનગરમાં કુખ્યાત બુટલેગર રાજુ ગેંડી અને વિજજુ બોડીનો આતંક સામે આવ્યો છે. અગાઉની ફરિયાદ સમાધાન કરવા ગાડીમાં તોડફોડ કરીને ધમકી આપવામાં આવી છે. એરપોર્ટ પોલીસે બુટલેગરને છાવરી રહી હોવાનો ફરિયાદીનો આક્ષેપ છે. ઘટના એવી છે કે સરદારનગરમાં જમીન લે વેચનું કરતા અજયભાઈ રાઘાણીના ઘર અને ઓફિસ પર કુખ્યાત રાજુ ગેંડીના સાગરીત વિજજુ ગેંડીએ તોડફોડ કરીને ધાક જમાવવાની કોશિશ કરી હતી. એટલું જ નહીં તેના ભાઈ લલિત રાધાણીને હથિયાર સાથે વિજજુ ગેંડીએ અટકાવીને સમાધાન કરવા ધમકી આપી. રાજુ ગેંડીએ 3 થી 4 વખત ધમકી આપીને તોડફોડ કરી. જેથી જમીન દલાલે પોલીસનું પ્રોટેકશન લીધું હતું. પરંતુ પ્રોટેક્શન દૂર થતાં ફરી બુટલેગરએ ગાડી પર તોડફોડ કરીને આંતક મચાવ્યો. 

પોલીસની મદદ કરવાની જમીન દલાલને મળી સજા
પોલીસને મદદ કરવાની સજા આ બન્ને ભાઈઓને મળી રહી છે . 2018માં રાજુ ગેંડીનો દારૂનો ધધો ધમધમી રહ્યો હતો. અજયભાઈની ઓફિસ નજીકમાં હતી.આ ઓફિસના CCTV રાજુ ગેંડીની ગેરકાયદે પ્રવૃતિઓ કેદ થઈ હતી. પોલીસે અજયભાઈ પાસે CCTV માંગતા જાગૃત નાગરિક તરીકે ફૂટેજ પોલીસને સોંપ્યા. જેથી પોલીસે બુટલેગર વિરુદ્ધ ગુનો નોંધી કાર્યવાહી કરી. જેની જાણ રાજુ ગેંડી અને તેના સાગરીત વિજજુ ગેંડીને થતા અજયભાઈ અને તેના પરિવાર પર હુમલો કર્યો. આ કેસમાં રાજુ ગેંડીને કાયમી જામીન નથી મળી રહ્યા જેથી  આરોપીઓએ આ પરિવારને ધમકી આપીને સમાધાન માટે દબાણ કર્યું. પરંતુ હદ તો એ આવી કે પોલીસે તોડફોડ ને લઈને ફરિયાદ તો નોંધી પરંતુ બુટલેગરનું નામ ઉલ્લેખ નહીં કરીને તેને છાવરી રહી હોવાનો આક્ષેપ થઈ રહ્યો છે.