બોરસદના સિસ્વા ગામે વરસાદી પાણી ઘૂસતા ફસાયેલા પરિવારનું સ્થળાંતરણ કરવામાં આવ્યું હતું જે દરમિયાન મામલતદારે બાળકીને ગોદમાં ઊંચકીને સલામત સ્થળે પહોંચાડી હતી.
બોરસદના સિસ્વા ગામમાં રેસ્ક્યૂ
રેસ્કયૂ દરમિયાન મામલતદારની મમતા આવી સામે
મામલતદાર આરતી ગોસ્વામીએ બાળકીને ઉંચકી લીધી
આણંદ જિલ્લાના બોરસદ પંથકમાં ભારે વરસાદ ખાબક્યો હતો. આ દરમિયાન અનેક ગામોમાં પાણી ભરાયા હતા. જેને પગલે સિસ્વા ગામમાં પણ નીચાણવારા વિસ્તારોમાં વરસાદી પાણી ઘૂસ્યા હતા.આથી સિસ્વા ગામની પટેલ વાડીમાં રહેતા લોકોનું સ્થળાંતરણ કરવાની નોબત આવી હતી. તંત્ર દ્વારા પુર અસરગ્રસ્ત વિસ્તારોના લોકોનું રેસ્ક્યૂ કરવામાં આવી રહ્યું હતું. જેમાં મામલતદારની મમતાના દર્શન થયા હતા. મામલતદાર આરતી ગોસ્વામીએ બાળકીને ગોદમાં ઊચકીને સુરક્ષિત સ્થળે પહોંચાડી હતી.
આ તકે ઉપસ્થિત લોકોએ મામલતદારની કામગીરીને બિરદાવી હતી. બીજી તરફ બોરસદમાં ભારે વરસાદથી સિસ્વા ગામ અસરગ્રસ્ત બન્યું છે. ત્યારે કલેક્ટર વાય.એમ દક્ષિણી અને ધારાસભ્ય રાજેન્દ્ર પરમાર સહિતના આગેવાનોએ સિસ્વા ગામની મુલાકાત લીધી હતી.