તોડ-પાણી / VIDEO : ખબર પડી ગઈ કે આવી ગઈ દિવાળી, પોલીસ વાનમાં હપ્તો લેતો વીડિયો વાયરલ

• દિવાળીની 'બોણી'ઉઘરાવતો વિડીયો વાયરલ 
• અમદાવાદ એરપોર્ટ પર પોલીસ વેનનો વિડીયો 
• કેટલાક પોલીસનાં કારણે પોલીસ આલમ બદનામ 

દિવાળીના દિવસો નજીક આવતા જ પોલીસ વિભાગમાં રહેલા કેટલાક કર્મચારીઓ ખીસામાં વધારાની ગરમી ભરવા તલપાપડ હોય છે. આમ તો વાર-તહેવારને પણ આ જ રીતે જોતા કેટલાક ખાખીધારી, સમગ્ર પોલીસ બેડાના કર્મચારીઓને શંકાની નજરે જોવા પ્રેરે તો આ કિસ્સો અમદાવાદ એરપોર્ટ પર બન્યો છે. અમદાવાદ એરપોર્ટ પર પોલીસ વેન પૈસા પડાવતી હોવાની વાત સામે આવતા,તર્ક-વિતર્ક શરુ થયા છે. 

આવા તત્વોથી પોલીસ પરિવાર બદનામ 

સમાજમાં પોલીસ એટલે શિસ્તપ્રિય,આદર્શ અને ન્યાયપ્રણાલીને અનુસરનારા.પરંતુ કેટલાક પોલીસ કર્મીઓ પોતાની વરદીને જાણે,ગેરકાયદે ઉઘરાણાનું લાયસન્સ સમજતા હોય તે રીતે,નાની દુકાનથી માંડીને શાકભાજીના ફેરીયા પાસેથી 'તોડ' કરવાનું ચુકતા નથી.પરિણામે,સમગ્ર પોલીસ વિભાગ તરફ સમાજ સાશંક નજરે જુએ છે. અમદાવાદ એરપોર્ટ પર પોલીસ વેન પૈસા ઉધરાવી હોવાનો પુરાવો સામે આવ્યો છે. એક વેપારી પાસેથી રૂપિયા 500 ઉઘરાવ્યા હોવાનો વિડીયો વાયરલ થતા ચકચાર મચી ગઈ છે.સ્થાનિક કક્ષાએ પોલીસે આ વિડીયો અંગે તપાસ શરુ કરી દીધી છે. ટૂંક જ સમયમાં,પોલીસ તંત્ર દૂધનું દૂધ કરીને પાણીને અલગ તારવી દેશે.