ગુજરાતમાં દારૂબંધી હોવા છતાં મોટા પ્રમાણમાં દારૂનુ વેચાણ થતુ હોવાના દાવા વિપક્ષી પાર્ટી સહિતના લોકો કરે છે. આ બધા વચ્ચે દરરોજ રાજ્યના અનેક વિસ્તારોમાંથી દારૂના જથ્થા પણ ઝડપાય છે. રાજ્યમાં લાંબા સમયથી દારૂબંધીનો કાયદો અમલમાં છે તેમ છતાં વિવિધ વિસ્તારોમાંથી મોટા પ્રમાણમાં દારૂના જથ્થા ઝડપાવાથી દારૂબંધીના કાયદાની અસરકારકતા ઉપર પણ સવાલો ઉઠી રહ્યા છે કે રાજ્યમાં દારૂ પ્રવેશે ક્યાંથી ? બોર્ડર પર પેટ્રોલીંગ કરતી પોલીસ પર પણ સવાલો ઊભા થઈ રહ્યા છે. ત્યારે વાવ ધારાસભ્ય ગેનીબેન ઠાકોર દારૂબંધી મામલે આકરાપાણીએ છે.
વિનુ સિંધી નામના બુટલેગરના અડ્ડા પર ગેનીબેન ઠાકોરની જનતા રેડ
બે દિવસ અગાઉ વિધાનસભામાં બુટલેગરોના નામ જાહેર કર્યા બાદ હવે ધારાસભ્ય ગેનીબેન ઠાકોરે ખુદ બુટલેગરને ઉઘાડા પાડવાની શરૂઆત કરી દીધી છે. ગેનીબેન ઠાકોરે રાતે ત્રણ વાગે ભાભરથી કોતરવાડાની કેનાલ ઉપરથી એક પિક વાનમાં મોટી માત્રામાં હેરાફેરી થતો દારૂનો જથ્થો પકડી પાડયો હતો. આ જનતા રેડમાં ગેનીબેન ઠાકોર સાથે આસપાસના યુવાનો જોડાયા હતા. વિનુ સિંધી નામના બુટલેગરના અડ્ડા પર કરેલી આ જનતા રેડમાં એક બુટલેગર પણ ગેનીબેને ઝડપી પાડયો હતો અને પોલીસને પણ રાતોરાત જિલ્લામાં આવા કામ થતાં હોવાની માહિતી આપી હતી.
ગેનીબેન ઠાકોરે શું કહ્યું?
ગેનીબેન ઠાકોરે રેડ કરતાં ચેતવણી આપી છે કે હવે બનાસકાંઠા જિલ્લાના યુવાધનને જો કોઈ બરબાદ કરવાનું વિચારશે તેણે આવી રીતે જ સબખ શીખવાડવામાં આવશે સાથે પ્રશાસન અને પોલીસ સામે આરોપ કરતાં કહ્યું હતું કે મે 15 માર્ચ 2022ના રોજ વિધાનસભામાં બુટલગેરના નામ જાહેર કર્યા હતા પણ સરકાર દ્વારા કોઈ પગલાં લેવામાં આવ્યા નથી અને જિલ્લા પોલીસ પણ બુટલેગરો સાથે મળેલી હોવાના આરોપ કર્યા છે. સાથે રાજસ્થાન સરહદમાંથી મોટા પાયે બનાસકાંઠામાં દારૂની હેરાફેરી થતી હોવાની વાત કહી હતી.
વિધાનસભામાં ગેનીબેન ઠાકોરે બુટલગેરના નામો કર્યા હતા જાહેર
આ પહેલા ગેનીબેને ભાભર ભાજપ પ્રમુખ ગંભીર આક્ષેપો કર્યા હતા. વિધાનસભા ગૃહમાં નામ ઉલ્લેખ સાથે ગેનીબેન ઠાકોરે વિનુ સિંધી, ભાભર નપા સભ્યના પુત્ર ધવલસિંહ રાઠોડ, સંજુભા રાઠોડ બુટલેગર પર આક્ષેપ કરતાં કહ્યું હતું કે ભાભર અને આજુબાજુના વિસ્તારમાં દારૂની સપ્લાય કરવામાં આવે છે જેમાં ભાજપ સભ્યોના સબંધીઓ ખુલ્લેઆમ દારૂનો ધંધો કરે છે પણ ન તો ગૃહ વિભાગ કોઈ કાર્યવાહી કરી રહ્યું છે ન તો પોલીસ
5 વર્ષમાં 6 હજાર કરોડનો દારૂનો જથ્થો પકડાયો
મહત્વનું છે કે ધારાસભ્ય શૈલેષ પરમારના નિવેદન મુજબ ગૃહ વિભાગના આ વર્ષના બજેટ કરતા 5 વર્ષમાં ઝડપાયેલો દારૂ જથ્થો મોંટો છે કારણ કે છેલ્લા પાંચ વર્ષમાં 521 કરોડનો વિદેશી દારૂ તેમજ દારૂ, બિયર, કેફી દ્રવ્યોનો 6 હજાર કરોડનો જથ્થો પકડાયો છે. આ સાથે એ વાતનો પણ ઉલ્લેખ કરવો જરૂરી બને છે કે આ તો ફકત જથ્થો પોલીસે કાર્યવાહી કરી ઝડપેલા જથ્થાના આંકડા છે. એ પણ વિચાર કરવો જોઈએ કે ન ઝડપાયેલો જથ્થો કેટલો હશે.અને તેણે કેટલા ઘર બરબાદ કર્યા હશે.
સળગતા સવાલ
દારૂબંધી છે છતા કેમ નિયમોનું ઉલ્લંઘન થઇ રહ્યું છે?
શું બુટલેગરોમાં પોલીસનો કોઇ ડર નથી?
શું આ છે રાજ્યની દારૂબંધી?
પ્રતિબંધ છતા કેવી રીતે દારૂનું વેચાણ થઇ રહ્યું છે?
દેશી દારૂની હાટડીઓ કેમ ધમધમી રહી છે ?
બુટલેગરે કોની રહેમ નજર હેઠળ બેફામ બન્યા છે ?
દારૂબંધીના લીરા કેમ વારંવાર ઉડાડવામાં આવે છે ?
બેફામ બુટલેગરોને કોણ છાવરી રહ્યું છે ?
દારૂના દૂષણની વરવી વાસ્તવિકતા એવી છે કે ગુજરાતની જો ગત મહિનાઓની ઘટનાની વાત કરીએ તો ક્યાંય અધિકારીઓ ઓફિસમાં બેસી દારૂની મહેફિલો માણી રહ્યા છે તો કયાંય શિક્ષક દારૂ ઢીંચીને શિક્ષણધામમાં જઈ રહ્યો છે. અરે હદ તો ત્યાં થાય છે કે દારૂની હાટડીઓ ચલાવતા બુટલેગરો સોશિયલ મીડિયામાં વીડીયો વાયરલ કરી પોલીસ હપ્તા લેતી હોવાનો આરોપ કરી રહ્યા છે. કહેવાય છે કે ગાંધીના ગુજરાતમાં કડક દારૂબંધી અને તેણે લગતા કાયદાઓ છે. પણ વાસ્તવિક સ્થિતિએ ઉપરોક્ત આકંડાઓ સમગ્ર પોલ ખોલી રહ્યા છે. ત્યારે કહેવાતી દારૂબંધીને કાગળ પર નહીં પણ જમીન પર કડક રીતે અમલ કરવાની જરૂર છે.