કેન્દ્ર શાસિત પ્રદેશ દીવમાં એકાએક દીપડાએ દેખા દેતા વન વિભાગ સાબદુ થઈ જવા પામ્યું હતું. ત્યારે વન વિભાગ દ્વારા પાંજરૂ મુકીને દીપડાને પકડવાની તજવીજ હાથ ધરી હતી.
કેન્દ્રશાસિત પ્રદેશ દીવમાં દીપડો દેખાયો
નાગવા બીચના દરિયા કિનારે દીપડાના આંટાફેરા
દિવ વન વિભાગે પાંજરા મુકી જંગલ વિસ્તારમાં સર્ચ ઓપરેશન હાથ ધર્યું
ગીર સોમનાથ નજીક આવેલ દીવ દરિયા કિનારો હોઈ રોજના હજારોની સંખ્યામાં પ્રવાસીઓ ફરવા આવતા હોય છે. ત્યારે આજે દીવના નાગવા બીચના દરિયા કિનારે એકા એક દીપડાએ દેખા દેતા પ્રવાસીઓમાં ભય ફેલાઈ જવા પામ્યો હતો. ત્યારે કેન્દ્રશાસિત પ્રદેશ દીવમાં દીપડો દેખાતા થોડાક સમય માટે પર્યટકોમા નાસભાગ મચી જવા પામી હતી. દીપડો દેખાયાની જાણ વન વિભાગને કરતા વન વિભાગ દ્વારા પાંજરા મૂકીને જંગલ વિસ્તારમાં સર્ચ ઓપરેશન હાથ ધર્યું હતું. દીપડો દેખાતા ત્યાં રહેલા પર્યટકોએ પોતાના મોબાઈલમાં દીપડાનો વીડિયો પણ ઉતાર્યો હતો.
સોનરડી ગામે દીપડાએ બાળકી પર હુમલો કરતા બાળકીનું મોત નિપજ્યું હતું
થોડા સમય અગાઉ જૂનાગઢના સોનરડી ગામે દીપડાએ આતંક મચાવ્યો છે. ત્યારે દીપડાએ અચાનક આવી બાળકી પર હુમલો કર્યો હતો. બાળકી પર હુમલો કરતા ઘાયલ બાળકીને સારવાર અર્થે લઈ જવામાં આવી હતી. જ્યાં સારવાર દરમ્યાન બાળકનું મોત નિપજવા પામ્યું હતું. સમગ્ર ઘટનાની જાણ વન વિભાગને કરવામાં આવતા વન વિભાગે દીપડાને પાંજરામાં પૂરવાની કામગીરી હાથ ધરી હતી.
રાજ્યના પાટનગરમાં પણ એકવાર દીપડો દેખાયો હતો
રાજ્યના પાટનગર ગાંધીનગરમા ફરી એકવાર દીપડો દેખાયો હોવાની આશંકા છે. ગાંધીનગર નજીક ફરી દીપડો દેખાતા લોકોમાં ફફડાટ ફેલાયો છે. ગાંધીનગરના બાસણ પાસે દીપડાના નિશાન જોવા મળ્યા હતા. જેને પગલે વન વિભાગને જાણ કરાતા વન વિભાગની ટીમના અધિકારીઓ દોડી ગયા હતા. જ્યા સર્ચ ઑપરેશન હાથ ધર્યું છે. ઉલ્લેખનીય છે કે ગાંધીનગરમાં દીપડો દેખાવાના સમાચાર સામે આવ્યા હતા. જેને પગલે વન વિભાગે તપાસ હાથ ધરી હતી.
2018માં દેખાયો હતો દીપડો
મહત્વનું છે કે, વર્ષ 2018માં નવા સચિવાલયમાં ઘુસી ગયેલા દિપડાએ સમગ્ર રાજ્યનો વહિવટ ઠપ કરી દીધો હતો અને સચિવાલય બંધ રાખવાની નોબત આવી હતી. જોકે તે બાદમાં મહામુસીબતે આ હિંસક દિપડાને વન વિભાગની દસ જિલ્લાની ટીમોએ પકડયો હતો.