ગુજરાત વિધાનસભાની ચૂંટણીને લઈને છેલ્લા ઘણા સમયથી રાજકીય પક્ષો દિવસ-રાત દોડધામ કરી પ્રચાર કરી રહ્યા છે. ત્યારબાદ તમામ રાજકીય પક્ષોનું ફોક્સ મતદાન પર હશે.
ગુજરાત વિધાનસભાની ચૂંટણીને લઈને છેલ્લા ઘણા સમયથી રાજકીય પક્ષો દિવસ-રાત દોડધામ કરી પ્રચાર કરી રહ્યા છે. પ્રથમ તબક્કામાં 89 બેઠકો પર 1 ડિસેમ્બરે મતદાન થયું હતું, જ્યારે બીજા તબક્કાનું મતદાન આગામી 5મી ડિસેમ્બરે યોજાશે. ત્યારે આજે સાંજે 5 વાગતા જ જાહેર પ્રચાર બંધ થઇ જશે. ત્યારબાદ તમામ રાજકીય પક્ષોનું ફોક્સ મતદાન પર હશે.
બાઈક રેલીમાં કમો પણ જોડાયો
વિધાસભાની ચૂંટણીનાં પ્રચારના અંતિમ દિવસે ભાજપ દ્વારા પ્રચાર તેજ કરી દીધો છે. ત્યારે પંચમહાલનાં હાલોલમાં ભાજપના ઉમેદવાર જયદ્રથસિંહ પરમારની બાઈક રેલી યોજાઈ હતી. ત્યારે ભાજપના ઉમેદવાર જયદ્વથસિંહ પરમાર સાથે કમો પણ જોડાયો હતો. ત્યારે બાઈક રેલીમાં કમાને જોવા માટે લોકો મોટી સંખ્યામાં ઉમટ્યા હતા.
રાજકીય પક્ષોના સ્ટાર પ્રચારકો ગજવશે સભાઓ
ગુજરાત વિધાનસભાની બીજા તબક્કાની ચૂંટણીનું કાઉન્ટડાઉન શરૂ થઈ ગયું છે. બીજા તબક્કાના મતદાનના પ્રચારનો આજે અંતિમ દિવસ છે. અંતિમ દિવસે રાજકીય પક્ષો-ઉમેદવારો મતદારોને આકર્ષવા માટે એડીચોટીનું જોર લગાવશે. પ્રચારના અંતિમ દિવસે ઉમેદવારો અને રાજકીય પક્ષોના સ્ટાર પ્રચારકો વિવિધ જગ્યાએ રેલીઓ અને સભાઓ ગજવશે. આજે સાંજે 5 વાગ્યે પ્રચાર પડઘમ શાંત થઈ જશે. પ્રચાર પડઘમ શાંત થયા બાદ ઉમેદવારો સોશિયલ મીડિયામાં વધુ સક્રિય થઈ જશે.
ત્રણેય પાર્ટીના નેતા કરશે પ્રચાર
આજે ભાજપ-કોંગ્રેસ-AAPના નેતાઓ જનસભાઓ ગજવશે. UPના CM યોગી આદિત્યનાથની આજે 3 જનસભા યોજાશે. જ્યારે કેન્દ્રીય મંત્રી પુરુષોત્તમ રૂપાલા 3 જિલ્લામાં પ્રચાર કરશે, તો આજે કેન્દ્રીય મંત્રી સ્મૃતિ ઈરાની અરવલ્લી અને પાટણમાં રોડ-શૉ કરશે. બીજા તબક્કા માટે કોંગ્રેસ નેતાઓ પણ જનસભા ગજવશે. પંજાબના મુખ્યમંત્રી ભગવંત માન 4 જગ્યાએ રોડ-શૉ કરશે.
14 જિલ્લાની કુલ 93 વિધાનસભા બેઠકો માટે 5મી ડિસેમ્બરે મતદાન
તમને જણાવી દઇએ કે, ગુજરાતમાં બીજા તબક્કાના 14 જિલ્લાની કુલ 93 વિધાનસભા બેઠકો માટે 5મી ડિસેમ્બરે મતદાન થશે. સોમવારના સવારના 8 વાગ્યાથી મતદાન શરૂ થઇને સાંજના 5 વાગ્યા સુધી મતદાન શરૂ રહેશે. જ્યારે આજ રોજ શનિવારના સાંજના પાંચ વાગ્યા બાદ જાહેરમાં ચૂંટણી પ્રચાર કે સભાઓ અને રેલી કે રોડ શો પર પ્રતિબંધ લાગી જશે. આ સાથે જ હવે પ્રચારના છેલ્લા દિવસે રાજકીય પાર્ટીઓ દ્વારા છેલ્લી ઘડીના પ્રચાર માટે એડીચોટીનું જોર લગાવવામાં આવી રહ્યું છે.