સુરતમાં એક અજીબો ગરીબ પ્રેમ કહાની સામે આવી હતી. લગ્ન પહેલા વરરાજા અને વહુના માતા અને પિતા ભાગી ગયા હોવાની ઘટના બની હતી. જેના કારણે લગ્નના બંધને બંધાવવા જઈ રહેલા વર-વધુનો સંબંધ તૂટી ગયો હતો. બાળકોના લગ્ન પહેલા જ વેવાઈ અને વેવાણ ભાગી ગયા હતા. ત્યારે હવે વેવાણ અને વેવાઇ બન્ને પરત આવ્યા છે. બન્ને રવિવારે અલગ અલગ પોલીસ સ્ટેશનમાં થયા હાજર...
વેવાઇ-વેવાણ થયા હાજર
અલગ અલગ પોલીસ સ્ટેશનમાં નોંધાવ્યા નિવેદન
વેવાણને પતિએ અપનાવવાનો કર્યો ઇન્કાર
સુરતમાં દીકરાના લગ્ન પહેલા પિતા વેવાણને લઈને ભાગ્યા હતા. અગાઉ એકબીજાથી પરિચિત અને ભૂતપૂર્વ પ્રેમી-પ્રેમિકા સંતાનોને પરણાવવાને બદલે એકબીજાની સાથે ભાગી ગયા હતા. આગામી 14 ફેબ્રુઆરીએ છોકરા-છોકરીના લગ્ન થવાના હતા. પરંતુ બંનેના માતા-પિતા એટલે કે વેવાઈ-વેવાણ ભાગી જતા બંને પરિવારોએ લગ્નનો ઈન્કાર કરી દીધો છે. ત્યાર બાદ બન્ને પરિવારોએ આ અંગે ફરિયાદ નોંધાવી હતી. જેને લઇને છેલ્લા કેટલાય દિવસથી આ કિસ્સો ચર્ચામાં આવ્યો હતો. ત્યારે રવિવારે વેવાઇ અને વેવાણ બન્ને અલગ અલગ પોલીસ સ્ટેશનમાં હાજર થઇ ગયા છે.
એક જ સમયે અલગ અલગ પોલીસ સ્ટેશનમાં હાજર થયા વેવાઇ-વેવાણ
વેવાઇ કડોદરા પોલીસ સ્ટેશનમાં હાજર થયા હતા. જ્યારે વેવાણ નવસારીના વિજલપોર પોલીસ સ્ટેશને હાજર થઇ હતી. હવે આ વેવાણના પતિએ તેમને અપનાવવાનો ના પાડતા વેવાણના પિતા સુરતથી પોતાની દિકરીને લેવા પહોંચ્યા હતા. ત્યારબાદ પિતા વિજલપોર પોલીસ સ્ટેશન પહોંચતા તેને સોંપી દેવામાં આવ્યા હતા. વેવાણ વિજલપોર પોલીસ સ્ટેશને હાજર થતા કોઇ સેલિબ્રિટી આવતા ઉમટે તેમ વેવાણને જોવા માટે ટોળુ એકત્ર થયું હતું.
હું મારી મરજીથી ગઇ અને આવીઃ વેવાણ
બંને વ્યક્તિ પ્રેમ પ્રકરણમાં સમજૂતીથી છુટા પડી ગયા છે તેમ વેવાણે જણાવ્યું હતું. વેવાણે પોલીસ સ્ટેશનમાં નિવેદન નોંધાવ્યું હતું કે, હું મારી મરજીથી ગઇ હતી અને હું મારી મરજીથી આવી છું. મને કોઇએ દબાણ નથી કર્યું. મારે લાંબુ કંઇ કરવું નથી.
કડોદરા પોલીસ સ્ટેશનમાં વેવાઇએ આપ્યું નિવેદન
જ્યારે બીજી તરફ વેવાઇ કડોદરા પોલીસમાં હાજર થયા હતા. જ્યાં તેમણે નિવેદન નોંધાવ્યું હતું કે, મારા દીકરાની સગાઈ તૂટવાના પ્રયાસ થતા આબરૂ જવાના ડરે ભાગી ગયા હતા. અને હવે પરત ફર્યા છીએ.
સોશિયલ મીડિયામાં બન્નેના ફોટા ફરતા થયા હતા.
દીકરા-દીકરીના લગ્નની તૈયારીઓ ચાલતી હતી ને વેવાઈ અને વેવાણ ભાગી જતા પરિવાર મુશ્કેલીમાં મૂકાયો હતો. આ ઘટના બનતા જ સોશિયલ મીડિયામાં વેવાઈ અને વેવાણ ભાગી ગયાના ફોટા અને મેસેજ ફરતા થયા હતા. બન્નેના સંબંધોને લઈને અનેક રમૂજી મેસેજ ફરતા થયા હતા. જોકે, બંને પરિવારના વડીલો અત્યંત શરમજનક સ્થિતિમાં મૂકાયા હતા.