ગુજરાત વિધાનસભાની ચૂંટણી પહેલા ભારે રાજકીય હલચલ જોવા મળી રહી છે. વિધાનસભાની ચૂંટણી નજીક આવતા પક્ષપલટો શરૂ થઈ ગયો છે. દહેગામના કોંગ્રેસના પૂર્વ ધારાસભ્ય કામિનીબા રાઠોડ બાદ યુથ કોંગ્રેસના 25 હોદ્દેદારોએ રાજીનામા આપ્યા છે.
ગુજરાત યુથ કોંગ્રસના નેતાઓએ છોડ્યો કોંગ્રેસનો સાથ
યુથ કોંગ્રેસના 25 હોદ્દેદારોએ આપ્યા રાજીનામા
આણંદના પેટલાદમાં 2 આગેવાનોએ છોડ્યો કોંગ્રેસનો હાથ
ગુજરાતમાં વિધાનસભાની ચૂંટણી ટાણે નેતાઓ નારાજ થઈ પોતાની પાર્ટી સાથે છેડો ફાડી રહ્યા છે. તેવામાં પક્ષથી લાંબા સમયથી નારાજ ગુજરાત યુથ કોંગ્રેસના મહામંત્રી બ્રિજેશ પટેલે કોંગ્રેસમાંથી રાજીનામુ ધરી દીધું છે. તો જયેશ પટેલ, રવિ પટેલ, ધવલ પટેલ, નિકુંજ ગજેરા સહિતના 25થી વધુ યુથ કોંગ્રેસના હોદ્દેદારોએ રાજીનામા આપી દીધા છે. તમામે હરપાલસિંહ ચુડાસમા અને જગદીશ ઠાકોરને રાજીનામા મોકલ્યા છે.
બ્રિજેશ પટેલે છોડ્યો કોંગ્રેસનો સાથ
પાટીદાર આંદોલન સમયથી જ હાર્દિક પટેલની સાથે રહેલા તેમના ખાસ સાથીદાર બ્રિજેશ પટેલે ગુજરાત પ્રદેશ યુવક કોંગ્રેસના મહામંત્રી પદેથી રાજીનામું આપી દીધું છે. બ્રિજેશ પટેલ છેલ્લા ઘણા સમયથી પક્ષથી નારાજ હતા. નારાજગીને લઇ બ્રિજેશ પટેલે કોંગ્રેસનો સાથ છોડ્યો છે.
દંતાલી ગામના પૂર્વ સરપંચ અને ઉપ સરપંચે આપ્યું કોંગ્રેસમાંથી રાજીનામું
બ્રિજેશ પટેલ ઉપરાંત જયેશ પટેલ, રવિ પટેલ, ધવલ પટેલ, નિકુંજ ગજેરા સહિતના 25થી વધુ યુથ કોંગ્રેસના હોદ્દેદારોએ રાજીનામા આપી દીધા છે. આણંદના પેટલાદમાં બે આગેવાનોએ કોંગ્રેસ છોડ્યું છે. દંતાલી ગામના પૂર્વ સરપંચ અને ઉપ સરપંચે પણ કોંગ્રેસમાંથી રાજીનામું આપ્યું છે. સ્વામી સચિદાનંદ આશ્રમ ખાતે બંને આગેવાનોએ ભાજપનો ખેસ ધારણ કર્યો છે.
કોંગ્રેસમાંથી છેડો ફાડી ભાજપમાં જોડાયા કામિનીબા રાઠોડ
નોંધનીય છે કે, ગુજરાતમાં વિધાનસભાની ચૂંટણીના પ્રથમ તબક્કાના મતદાન પહેલાં જ કોંગ્રેસમાં ભંગાણ યથાવત રહ્યું છે. ગઈ કાલે દહેગામના પૂર્વ ધારાસભ્ય કામિની બા રાઠોડે કેસરીયો ખેસ ધારણ કર્યો હતો. કોંગ્રેસમાંથી ટિકિટ ન આપતા કામિનીબા નારાજ હતા અને કામિનીબા રાઠોડે અપક્ષ ઉમેદવારી નોંધાવી હતી. ત્યારબાદ 21 નવેમ્બરે અપક્ષ ઉમેદવારી ફોર્મ પરત ખેંચી લીધું હતું અને ગતરોજ વિધિવત રીતે ભાજપમાં જોડાઈ ગયા હતા.
કોંગ્રેસમાં સાચા વ્યક્તિનો અવાજ દબાવવાનો થતો હતો પ્રયાસ: કામિનીબા
ભાજપનો ખેસ ધારણ કર્યા બાદ કામિનીબા રાઠોડે પ્રતિક્રિયા આપી હતી. તેમણે જણાવ્યું હતું કે, વડાપ્રધાન નરેન્દ્ર મોદીની વિચારધારાથી પ્રેરિત થઈને હું આજે ભાજપમાં જોડાઈ છું. કોંગ્રેસની અંદર સાચા અને સારા માણસોની કદર થતી નથી. પક્ષમાં એક મહિલા તરીકે મેં સવિશેષ કામગીરી કરી છે, છતાં કોંગ્રેસે તેની કદર કરી નથી. ઉપર જતાં મારી પર આક્ષેપબાજી અને આરોપો લગાવવામાં આવ્યા. મહિલાની મદદે આવવાને બદલે કોર્ટની નોટિસ ફટકારવાની ધમકીઓ આપવામાં આવી અને મહિલાનો અવાજ દબાવવા પ્રયાસ કરાયો છે. આવી પાર્ટીમાં રહેવું મને યોગ્ય લાગતું નથી.