અમેરિકા જવા ઈચ્છતા લોકો માટે મહત્વના સમાચાર સામે આવ્યા છે. અમેરિકા માટે મળતા વિઝાની પ્રક્રિયાના સમયમાં ઘટાડો થશે. તાજેતરમાં વિદેશ મંત્રી એસ જયશંકરે અમેરિકાના વિદેશ મંત્રી એન્ટની બ્લિંકનની સમક્ષા આ મુદ્દો ઉઠાવ્યા બાદ કાર્યવાહી હાથ ધરવામાં આવી છે.
અમેરિકા જવા ઈચ્છતા લોકો માટે ખૂબ મહત્વના સમાચાર
અમેરિકા માટે મળતા વીઝાની પ્રક્રિયાના સમયમાં થશે ઘટાડો
દિલ્લીમાં US એમ્બેસીના કોન્સ્યુલર અફેર્સ મિનિસ્ટરનું નિવેદન
વિદેશ મંત્રી એસ જયશંકરે તાજેતરમાં અમેરિકાના વિદેશ મંત્રી એન્ટની બ્લિંકનની સામે વિઝા માટે લાંબી રાહ જોવાનો મુદ્દો ઉઠાવ્યો હતો. હવે તેની અસર પણ જોવા મળી રહી છે. નવી દિલ્લી સ્થિત યુએસ એમ્બેસીએ હવે યુએસ વિઝા (USA Visa) મેળવવા માટે લાગતા સમયને ઘટાડવાની દિશામાં કામ શરૂ કર્યું છે. વાસ્તવમાં, તાજેતરમાં એવા સમાચાર આવ્યા હતા કે ભારતીયોને અમેરિકી વિઝા માટે બે વર્ષ સુધીની રાહ જોવી પડી રહી છે, જ્યારે ચીન માટે આ વિઝા અરજી માત્ર બે દિવસમાં સેટલ થઈ રહી છે. જેના કારણે ભારત ઘણું નારાજ હતું.
US Embassyના કોન્સ્યુલર અફેર્સ મિનિસ્ટર ડોન હેફ્લિને ગુરુવારે જણાવ્યું હતું કે, ભારતમાં કોન્સ્યુલેટ્સના કર્મચારીઓ એક વર્ષથી પણ ઓછા સમયમાં પ્રી-કોવિડ લેવલ પર પાછા ફરે તેવી અપેક્ષા છે. તેમણે જણાવ્યું હતું કે, અસ્થાયી સ્ટાફની નિમણૂંક અને ડ્રોપ બોક્સ (તે લોકોને કોઈ એપોઈન્ટમેન્ટની જરૂર નહીં પડે, જેમની પાસે પહેલેથી જ યુએસ વિઝા હતા, પરંતુ તે એક ચોક્કસ સમયમર્યાદામાં સમાપ્ત થઈ ગયા)ને મંજૂરી આપવા જેવા પગલાથી વચગાળાના વેટિંગ પીરિયડમાં ઘટાડો કરવામાં મદદ મળશે.
એક લાખ લોકોની થશે નિયુક્તિ
ડોન હેફ્લિને વધુમાં જણાવ્યું હતું કે, આગામી થોડા અઠવાડિયામાં H અને L વર્કર વિઝા કેટેગરીની એક લાખ નિયુક્તિઓ માટે શરૂઆત કરવામાં આવશે. વિઝા માટે લાંબા સમય સુધી રાહ જોવા પાછળનું કારણ કોરોના જણાવવામાં આવ્યું. અમેરિકી દૂતાવાસે કહ્યું કે, એક વર્ષથી પણ ઓછા સમયમાં સ્ટાફ પ્રી-કોવિડ લેવલ એટલે કે 100 ટકા પર આવી જશે.
આ અઠવાડિયાની શરૂઆતમાં વિદેશ મંત્રી એસ જયશંકરે તેમના યુએસ સમકક્ષ બ્લિંકનની સમક્ષ આ મામલો ઉઠાવી ભારતમાં બૈકલૉગને ઘટાડવા માટે યુએસ અધિકારીઓને સહયોગની ઓફર કરી હતી.
હાલ 70 ટકા સ્ટાફ કરી રહ્યો છે કામ
કોન્સ્યુલર અફેર્સ મિનિસ્ટર હેફ્લિને કહ્યું, ‘સારા સમાચાર એ છે કે અમે કોવિડથી રિકવર થઈ ચૂક્યા છીએ અને કોવિડ પછી સ્ટાફની સમસ્યાઓનું નિરાકરણ લાવવામાં આવી રહ્યું છે. કોરોનાકાળમાં અને તે પછી અમારી પાસે લગભગ 50 ટકા વિઝા સ્ટાફ હતો. હવે અમારી પાસે 70 ટકા જેટલો સ્ટાફ છે. અમે આવતા વર્ષે આ સમય પહેલા લગભગ 100% સ્ટાફિંગ કરવા જઈ રહ્યા છીએ.'
100 ટકા સ્ટાફ સાથે થશે વિઝા અરજીનું કામ
તેમણે કહ્યું, ‘એક સમયે અમે ફરીથી પહેલાની જેમ 100 ટકા સુધી વિઝા અરજીઓને હેન્ડલ કરવાના છીએ.’ જેમ-જેમ યુએસ એમ્બેસીમાં સ્ટાફ વધશે. તેમ-તેમ વિઝાને લઈને લાગતો સમય ઓછો થઈ જશે.