IPL 2021 / ધોની સામે આવતા જ બોલતી બંધ થઈ ગઈ! વિસ્ફોટક બેટ્સમેન ઐય્યરે ફાયનલ બાદ શું કહ્યું જુઓ

• ધોની સામે આવતા જ વેન્કટેશ ઐયરની બોલતી બંધ થઈ ગઈ
• ધોની એક અલગ વ્યક્તિત્વ ધરાવે છે
• ધોની એકદમ શાંત છે, તે પોતે વ્યૂહરચના બનાવે છે

ફાઇનલમાં મહેન્દ્ર સિંહ ધોનીના નેતૃત્વમાં ચેન્નઈ સુપર કિંગ્સે કોલકાતાને હરાવ્યું હતું. દરમિયાન, અય્યરે ધોનીને મળવાની તક ગુમાવી ન્હોતી, પરંતુ ધોનીની સામે ગયા પછી ઉલટાની તેની બોલતી બંધ થઈ ગઈ હતી. 

આ વાત અય્યરે ન્યૂઝ એજન્સી સાથે કરી હતી. જ્યારે અય્યરને પૂછવામાં આવ્યું કે ધોનીને મળ્યા બાદ કેવું લાગે છે, ત્યારે તેણે કહ્યું કે, હું તેમની સાથે વાત કરી શકતો ન્હોતો. ધોની એક એવી પર્સનાલિટી છે. હું તેને જોતો રહ્યો અને મેદાનમાં પણ માત્ર તેને જ જોતો રહ્યો હતો. એ એવા જ છે જેવી તેમના વિશે વાતો થાય છે. ઐયરને ધોની માટે એક અલગ જ લાગણી હતી. અને તે એકદમ શાંત છે. દૂરથી જ ખ્યાલ આવી શકે છે કે તે પોતાને કેટલો કુલ રાખે છે, પોતે સ્ટ્રેટેજી બનાવે છે અને મેચ લઈ આવે છે. 

યુએઈમાં ટીમ ઈન્ડિયા સાથે રહેશે

અય્યરે IPL 2021 માં 10 મેચમાં 370 રન બનાવ્યા અને ત્રણ વિકેટ પણ લીધી. આ પ્રદર્શન માટે અય્યરને જાણે ઈનામ પણ મળ્યું. તે યુએઈમાં જ છે અને ટી 20 વર્લ્ડ કપમાં ટીમ ઈન્ડિયાને મદદ કરવા તેમની સાથે પણ જોડાયો છે. જ્યારે ટીમ ઇન્ડિયામાં જોડાવા અંગે અય્યરને પૂછવામાં આવ્યું ત્યારે તેણે કહ્યું કે, હું બહુ ખુશ છું. હું આ વાત વ્યક્ત કરી શકતો નથી. મને આ તક પણ આપવામાં આવી છે. હું મારી કેપેસિટીથી જે કંઈ કરી શકું તેમાં યોગદાન આપીશ. જ્યારે પણ હું ટીમમાં ગમે તે રીતે ફાળો આપી શકું, હું મારું સંપૂર્ણ અને 100% આપીશ પણ મને ખબર નથી કે ભવિષ્યમાં શું થશે.

મોર્ગન સાથે સરખામણી

અય્યરે ફાઇનલમાં મેચમાં પણ શાનદાર પ્રદર્શન કર્યું અને 50 રન બનાવ્યા. અય્યરે 32 બોલમાં પાંચ ચોગ્ગા અને ત્રણ છગ્ગા ફટકાર્યા હતા. તેણે શુભમન ગિલ સાથે મળીને ટીમને સારી શરૂઆત આપી હતી. આ જોડીએ પ્રથમ વિકેટ માટે 91 રન જોડ્યા હતા. પરંતુ આ જોડી જલદી પેવેલિયન પરત ફરી. પછી તો કોલકાતાની ટીમ બેકફૂટ પર આવી ગઈ હતી પણ અય્યરે જે રીતે બેટિંગ કરી છે તે જોઈને તેની સરખામણી કોલકાતા નાઈટ રાઈડર્સ અને ઈંગ્લેન્ડના કેપ્ટન ઈયોન મોર્ગન સાથે કરવામાં આવી છે. જ્યારે તેને આ મામલે પૂછવામાં આવ્યું ત્યારે તેણે કહ્યું કે, તે એક મહાન ખેલાડી છે, મોર્ગન તો ચેમ્પિયન છે. તે વર્લ્ડ ચેમ્પિયન કેપ્ટન છે. તે આખી ટીમને પોતાની સાથે લઈ જાય છે, હું પણ તેની સાથે રમવા માટે ઘણો ઉત્સાહિત હતો. મને સારું રમવા મળ્યું તેનો આનંદ છે.