અમદાવાદ / પિતાએ દીકરાને શાળાએ જવાનું કહેતા આવ્યું એવું પરિણામ કે પોલીસ સ્ટેશન જવું પડ્યું

• પોલીસના ડરે બાળક થયો ગુમ
• શાળાએ નહીં જતા માતા પિતાએ પોલીસ પાસે લઇ જવાની આપી ચીમકી
• છેલ્લા કેટલાય દિવસોથી સગીર બાળક શાળાએ જતો નહતો

હાલ માતા-પિતા પોતાના બાળકને શોધવા માટે થઈને વેજલપુર પોલીસ મથકે આવ્યા છે. ડ્રાઈવીંગનો વ્યવસાય કરીને પોતાના પરિવારનું ભારણ પોષણ કરનારા આ વ્યક્તિએ પોતાના ૧૩ વર્ષીય બાળકને આજથી બે દિવસ અગાઉ ઠપકો આપ્યો હતો. કારણ કે તેમનો બાળક સ્કુલે જતો ન હતો જેથી  પિતાએ બાળક સ્કુલે નહિ જતા પોલીસે પાસે લઈ જવાની ડર બતાવીને ઠપકો આપ્યો હતો. જેના પગલે સાતમાં ધોરણમાં ભણતો આ બાળક બીક ના લીધે ક્યાંક ચાલ્યો ગયો છે. જેના પગલે વેજલપુર પોલીસ મથકે ફરિયાદ નોંધાઈ છે. બીજી તરફ બાળક સગીર હોવાથી પોલીસ અપહરણ અને ગુમ થયા અંગેની ફરિયાદ નોંધીને તપાસ શરૂ કરી.

પત્નીએ પતિને કહ્યું- આપણો છોકરો નિશાળે નથી જતો

વેજલપુર વિસ્તારમાં રહેતા એક પરિવાર જેમાં પત્ની શહેરની ખાનગી હોસ્પિટલમાં નોકરી કરતી હતી. પતિ ડ્રાઈવીંગનો ધંધો કરે છે અને થોડા દિવસો અગાઉ ગુજરાત બહાર ગયા હતા. બહાર ગામથી પરત આવ્યા બાદ તેની પત્નીએ પોતાના ૧૩ વર્ષીય બાળક વિષે ફરિયાદ કરી હતી કે આપણો બાળક છેલ્લા કેટલાક દિવસોથો શાળાએ જતો નથી.

પતિએ દીકરાને કહ્યું- કે જો હવે સ્કુલે નહિ જાય તો...

બીજા દિવસે માતા-પિતાએ બંનેએ બેસીને પોતાના સગીર બાળકને સમજાવ્યો અને કહ્યું કે જો હવેથી સ્કુલે નહિ જાય તો તને પોલીસને પાસે લઇ જઈશું. પોલીસનો ડર લાગતા આ સગીર બાળક ગભરાઈ ગયું હતું અને ઘર છોડીને ચાલી ગયું હતું.

ઉલ્લેખનીય છે કે સમગ્ર બનાવની જાણ માતા-પિતા દ્વારા વેજલપુર પોલીસમા કરવામા આવી હતી. ઘટનાની ગંભીરતાને જોતા પોલીસે આસપાસના સીસીટીવી ફૂટેજની ચકાસણી કરીને બાળકના ફોટો જુદા-જુદા પોલીસ સ્ટેશનમા મોકલીને તેની શોધખોળ શરૂ કરી છે.