રેકોર્ડ / જો તમારા વાહનમાં પીયુસી નહી હોય તો RTOમાં તરત જ પડી જશે ખબર

આ માટે શહેરના ૧પ૦થી વધુ પીયુસી (PUC) સેન્ટરના સંચાલકોને આરટીઓ દ્વારા જાણ કરી દેવામાં આવી છે. અત્યાર સુધી પ૦થી વધુ સેન્ટર માલિકોએ ઓનલાઇન સિસ્ટમ ડેવલપ કરવા માટે ઓનલાઇન અરજી કરી દીધી હોવાનું સૂત્રો દ્વારા જાણવા મળે છે.

ટ્રાફિકના નિયમોના ભંગ બદલ ટ્રાફિક પોલીસ દ્વારા દંડનો મેમો આપવામાં આવે છે, ત્યારે આરટીઓમાં દંડ ભરતી વખતે વિહિકલનું  પીયુસી (PUC) નહીં ધરાવનારા વાહન માલિકો પાસેથી રૂપિયા એક હજારનો દંડ વસૂલવામાં આવે છે. તેમજ વાહન માલિકે અન્ય વ્યક્તિને વાહન ચલાવવા આપ્યું હોય અને પકડાઈ જાય તો આવા કિસ્સામાં બે હજાર રૂપિયાના દંડની વસૂલવાની જોગવાઈ છે.

 

જોકે આગામી દિવસોમાં આ દંડની રકમમાં પણ વધારો થઈને રૂ.પ,૦૦૦ થવાની શક્યતા છે. હવે બે હજાર રૂપિયાનો દંડ બચાવવા માટે કેટલાક દલાલો નકલી પીયુસી બનાવીને રજૂ કરી દે છે અને અસલ કોપીને સ્કેન કરીને તેમાં વાહન માલિકનો ડેટા બદલી નાખીને કલર પ્રિન્ટ કાઢી લેતા હોવાની આરટીઓને અનેક ફરિયાદો મળી છે.

દલાલોની આ ઓપરેન્ડીને ધરમૂળમાંથી નાથવા માટે તંત્ર દ્વારા એક્શન પ્લાન તૈયારકરવામાં આવ્યો છે. આ એકશન પ્લાનને અમલમાં મૂકવા માટે કવાયત હાથ ધરવામાં આવી છે વાહન વ્યવહાર વિભાગ દ્વારા રાજ્યના તમામ પીયુસી સેન્ટરને ઓનલાઇન કરવાની શરૂઆત કરવામાં આવી છે.
 

જેમાં પી.યુ.સી સેન્ટરનો રેકોર્ડ આરટીઓને જોવા મળશે. વિહિકલ નંબર નાખતાં જ આરટીઓ ને ખબર પડી જશે કે વાહન માલિકોએ પીયુસી કરાવ્યું છે કે નહીં. શહેરના તમામ સેન્ટરના સંચાલકોને આરટીઓ (RTO) દ્વારા  ઓનલાઈન ફોર્મ ભરવા માટે સૂચના આપી દેવામાં આવી છે.

અત્યાર સુધીમાં ૫૦થી વધુ સંચાલકોએ ઓનલાઈન ફોર્મ ભરીને પ્રક્રિયાની શરૂઆત કરી દીધી છે. હવે ખૂબ જ ટૂંકા ગાળામાં પી.યુ.સી  સેન્ટરનો ડેટા આરટીઓમાં ઓનલાઇન થઈ જશે.