મોંઘવારી / શાકભાજીમાં ભૂક્કાં કાઢી નાંખે એટલા ભાવ વધ્યાં, જાણો સંપૂર્ણ લિસ્ટ

શાકભાજીનાં વિક્રેતાનાં જણાવ્યાં પ્રમાણે હાલમાં ઉનાળાની ગરમીના કારણે શાકભાજીની આવક ઓછી થઇ ગઇ છે તેથી ભાવમાં એકાએક વધારો થયો છે. સામાન્ય દિવસોમાં શાકભાજી રૂ. ૪૦ના કિલો મળતાં હતાં તે વધીને રૂ. ૧૪૦ની આસપાસ થયાં છે. જેમાં પરવળ, વટાણા, ચોળી જેવાં શાકના ભાવ રૂ. ૧૪૦ થી ૧૬૦ થઇ ગયા છે. ઉનાળામાં લીંબુનો વપરાશ વધુ રહેતો હોઈ તેનાં ભાવમાં પણ ઉછાળો જોવા મળ્યો છે.

લીંબુના ભાવ પણ ૧ કિલોનાં રૂ. ૧૬૦ને આંબી ગયાં છે. તેવી જ રીતે મરચાં અને આદુંનો ભાવ પણ એક કિલોનાે રૂ. ૧૬૦એ પહોંચી ગયો છે. મોંઘવારીમાં પીસાતી પ્રજાને શાકભાજીનો ભાવ વધારો પડતા પર પાટું સમાન છે. ઉનાળામાં શાકભાજીની આવક ઓછી થતાં થોડા વધે પરંતુ બમણાં થાય નહીં. જમાલપુરનાં શાકમાર્કેટમાં શાકભાજી ઓછા ભાવે મળે તેના બમણા ભાવ સેમી હોલસેલ માર્કેટમાં વસૂલાતા હોઈ શાકભાજીના વેપારીઓએ સિન્ડિકેટ રચી ભાવ વધારાનો કારસો કર્યાનું લોકો માની રહ્યા છે. જમાલપુર શાકમાર્કેટમાં લીંબુ, કોથમીર, લીલાં  મરચાં રૂ.૯૦થી ૧૦૦ના કિલો મુજબ વેચાય છે. જયારે પાલડી પાસે આવેલ સેમી હોલસેલ માર્કેટમાં લીલાં શાકભાજી ડબલ ભાવે વેચાણ થઈ રહ્યાં છે.