વિરોધ / તલાટીઓની હડતાળ પૂરી થતાં જ ગુજરાતમાં વધુ એક આંદોલન, સરકારનું વધશે ટેન્શન

• તલાટીઓની હડતાળ પૂરી થતાં જ વધુ એક આંદોલન
• ગ્રામ પંચાયતના VCE પડતર પ્રશ્નોને લઈને આવતીકાલથી કરશે આંદોલન
• 24 ઑગષ્ટે VCE કાળી પટ્ટી ધારણ કરી ફરજ બજાવશે
   

ગુજરાત વિધાનસભાની ચૂંટણી નજીક આવી રહી છે તેમ રાજ્યમાં એક બાદ એક આંદોલન વેગ પકડી રહ્યા છે. માજી સૈનિકોનું આંદોલન, પોલીસ ગ્રેડ પે માટેનું આંદોલન, ત્યારબાદ તલાટીઓની હડતાળ અને હવે વધુ એક આંદોલનના ભણકારા વાગી રહ્યા છે. 

હવે VCE આંદોલનના માર્ગે 

તલાટીઓની હડતાળ પૂરી થઇ તો હવે VCE  પડતર પ્રશ્નોને લઇને આંદોલનનો માર્ગ અપનાવશે. 24 ઑગષ્ટના રોજ કાળી પટ્ટી ધારણ કરીને ફરજ પર હાજર થશે. જ્યારે 26 ઑગષ્ટના રોજ સોશિયલ મીડિયામાં સરકાર સામે ઝુંબેશ ચલાવશે.  30 ઑગષ્ટે પછી આંદોલન વધુ આકરુ બનાવશે. છેલ્લા ઘણા વર્ષોથી વીસીઇ માત્ર કમિશનથી જ કામ કરે છે. 

VCEની શું હોય છે કામગીરી ?

અંદાજે 14 હજાર ગ્રામ પંચાયતોમાં 14 હજાર VCE કર્મી છે. રાજ્યની તમામ ગ્રામ પંચાયતોમાં ઇ-ગ્રામ કેન્દ્રો આવેલા છે આ તમામ ઇ-ગ્રામ કેન્દ્રમાં VCE કર્મી હોય છે. જેઓ  રાજ્ય સરકારની તમામ યોજનાની કામગીરી કરે છે.  સરવેને લગતી ડિજિટલ કામગીરી કરે છે.  ડિજિટલ સેવા સેતુને લગતી કામગીરી કરે છે  આ ઉપરાંત તેઓ મહેસૂલ વિભાગની કામગીરી કરે છે.  નાગરિક અને અન્ન પુરવઠા વિભાગ તથા ચૂંટણીને લગતી કામગીરી કરે છે. સામાજિક ન્યાય અધિકારીતા વિભાગ તથા પંચાયતને લગતી કામગીરી કરે છે. 

VCE કર્મીઓની શું છે માંગ 

• કમિશન પ્રથા પોલિસી હટાવી ફિક્સ વેતનથી કાયમી નિમણૂંક કરવી
• સરકારી લાભો આપી સમાન કામ સમાન વેતનની માગ
• VCEને રક્ષણ આપવામાં આવે
• VCE અને પરિવારને આરોગ્ય સુવિધા આપવામાં આવે, વીમા કવચ આપવામાં આવે
• VCEની કામગીરીનો જોબ ચાર્ટ નક્કી કરવામાં આવે
• VCEને ક્લાર્ક ક્રમ કોમ્પ્યુટર સાહસિકમાં રૂપાંતર કરી વર્ગ-3 ના દરજ્જા સાથે સરકારી કર્મચારી જાહેર કરો
• ઈ-ગ્રામ પોલિસી હટાવી સરકારી પગાર ધોરણ લાગુ કરવામાં આવે
• જોબની સિક્યુરિટી આપવામાં આવે