વિવાદિત નિવેદન / VIDEO : સચિવાલયને પવિત્ર કરવું પડશે, મને ગેટ પર બેસાડજો ભાજપવાળાને અંદર ઘુસવા નહીં દઉ

• કોંગ્રેસ MLA ગેનીબેન ઠાકોરનું વિવાદિત નિવેદન
• સચિવાલયને ગંગાજળથી પવિત્ર કરવું પડશેઃ ગેનીબેન
• મને સચિવાલયના ગેટ પર બેસાડજો ભાજપવાળાને અંદર ઘુસવા દેવા નથી: ગેનીબેન

વિવાદોનાં ગેનીબેન 
ગુજરાત કોંગ્રેસનાં મહિલા ધારાસભ્ય ગેનીબેન ઠાકોર ફરીવાર વિવાદમાં આવ્યા છે, ગેનીબેન ઠાકોરનો એક વીડિયો અત્યારે ખૂબ વાયરલ થઈ રહ્યો છે જેમાં તેઓ ભાજપ ધારાસભ્યો સામે વિવાદિત નિવેદન આપતા દેખાઈ રહ્યા છે. ગેનીબેને કહ્યું છે કે મને સચિવાલયનાં ગેટ પર બેસાડજો એકેય ભાજપવાળાને અંદર ઘૂસવા નથી દેવાના. 

ભાજપવાળાઓને પેસવા દેવાના નથી : ગેનીબેન 
ગેનીબેને કહ્યું કે જ્યારે આપણી સરકાર આવે એટલે કોંગ્રેસની સરકાર આવે અને હું જો માત્ર ધારાસભ્ય જ હોઉં તો મને મંત્રીપદ નથી જોઈતું, ચેરમેન પદ નથી જોઈતું. કામ પણ નથી કરવું, પરંતુ મને વિધાનસભાનાં ગેટ પર બેસવાનું કામ આપી દેજો. આ ભારતીય જનતા પાર્ટીનાં લોકોને સચિવાયલમાં ઘૂસવા દેવાના નથી. હરિદ્વારથી આખી ટ્રેન ભરીને લાવી અને ગંગાજળથી સચિવાયલ ધોશો ત્યારે સચિવાયલ પવિત્ર થશે. 

વાવથી કોંગ્રેસનાં ધારાસભ્ય ગેનીબેને દિયોદરની એક સભામાં આ વિવાદિત નિવેદન આપ્યું છે. બીજી તરફ આજે ગરીબ કલ્યાણ અન્ન ઉત્સવ ગુજરાત સરકાર ઉજવવામાં આવ્યો હતો જેમાં વડાપ્રધાન મોદી પણ સામેલ થયા હતા ત્યારે ગેનીબેને આ કાર્યક્રમને ફોટા પડાવવા માટેના તાયફા ગણાવ્યા હતા. 

અગાઉ પણ વિવાદો સર્જી ચૂક્યા છે ગેનીબેન 
નોંધનીય છે કે ગેનીબેન ઠાકોર અગાઉ પણ પોતાના આવા જ નિવેદનોનાં કારણે ચર્ચા અને વિવાદમાં રહ્યા છે. કોંગ્રેસનાં ફાયરબ્રાન્ડ નેતા તરીકે તેઓ છવિ ધરાવે છે અને પોતાના ભાષણોથી ગુજરાતનાં રાજકારણને ગરમાવવામાં અગત્યનો ભાગ ભજવે છે.