શહેરમાં તસ્કરો પોલીસના ખોફ વગર બેફામ બન્યા હોય તેમ ઠેર ઠેર ચોરીની ઘટનાને અંજામ આપીને નાસી જાય છે ત્યારે શહેરના પૂર્વ વિસ્તારમાં ચોર ટોળકીએ લોકોમાં એ હદે ખોફ ફેલાવ્યો છે કે ચોરીને અંજામ આપતી બુકાનીધારી ચોર ટોળકી ખુલ્લેઆમ તલવાર જેવાં ઘાતક-તીક્ષ્ણ હથિયાર સાથે સીસીટીવી કેમરામાં દેખાતાં સ્થાનિક લોકોમાં ફફડાટ વ્યાપી ગયો છે.
પોલીસસૂત્રો પાસેથી મળેલી માહિતી મુજબ વટવા જીઆઇડીસી નજીક વિંઝોલ રોડ પરના સત્સંગ એપાર્ટમેન્ટમાં થોડા દિવસ પહેલાં ત્રણ ચોર ટોળકી ચોરી કરવા આવી હતી. આ ટોળકીના તમામ પોતાનું આખું મોં ઓળખી ન શકાય તે રીતે મોં પર બુકાની બાંધીને હાથમાં હથિયાર સાથે બેખોફ બની સત્સંગ એપાર્ટમેન્ટમાં બિનધાસ્ત ફરતા હતા.
જે એપાર્ટમેન્ટમાં લગાવેલા સીસીટીવી કેમેરાના ફૂટેજમાં જોવા મળ્યા હતા. આ આખી ટોળકીએ સત્સંગ એપાર્ટમેન્ટના એક મકાનમાં ચોરીની ઘટનાને અંજામ આપવાની કોશિશ કરી હતી, પરંતુ તે ચોરી કરવામાં નિષ્ફળ રહ્યા હતા, જોકે આ એપાર્ટમેન્ટમાં લાગેલા સીસીટીવીમાં સ્પષ્ટ રીતે દેખાઈ આવે છે કે કઈ રીતે તસ્કરો ચોરી કરવા ફરી રહ્યા હતા.
જોકે એપાર્ટમેન્ટના સીસીટીવી સામે આવતાં વટવા જીઆઈડીસી વિસ્તારમાં વિંઝોલ રોડ પર બનેલી આ ઘટના પછી પોલીસ પણ દોડતી થઈ છે. વટવા જીઆઈડીસી પોલીસ સ્ટેશનના પીઆઈ ડી. આર. ગોહિલે જણાવ્યું હતું કે આ એપાર્ટમેન્ટમાં ચોરીની ઘટના બની હતી. જોકે ટૂંક સમયમાં આ ટોળકીને પકડી લેવામાં આવશે. પોલીસ દ્વારા આ ચોર ટોળકીને પકડવા એક સ્પેશિયલ ટીમ બનાવી લેવામાં આવી છે.