કોરોના વાયરસ / બૉલીવુડની એક સિંગરને થયો કોરોના અને દેશના 5 દિગ્ગજ નેતા પહોંચી ગયા આઈસોલેશનમાં

• વરુણ ગાંધી અને દીપેન્દ્ર હુડ્ડા પણ સેલ્ફ આઈસોલેશન 
• દુષ્યંત સિંહના સંપર્કમાં આવનાર નેતાઓએ પોતાને આઈસોલેટ કર્યા 
• કનિકા કપૂરને કોરોના વાયરસની પુષ્ટિ બાદ નેતાઓમાં ખળભળાટ 

કનિકા કપૂર સાથે પાર્ટીમાં જનાર રાજસ્થાનનાં પૂર્વ સીએમ વસુંધરા રાજે અને તેમના પુત્ર આઈસોલેશનમાં છે. આ બંને નેતાઓ ઉત્તરપ્રદેશમાં સ્વાસ્થ્ય મંત્રીની પાર્ટીમાં ગયા હતા. 
દુષ્યંત સિંહ તો પાર્ટીમાં ગયા બાદ લોકસભા પણ ગયા અને રાષ્ટ્રપતિ ભવન પણ ગયા હતા. 

આ સાથે બુધવારે કનીમોઝીનાં ઘરે એક કાર્યક્રમમાં અનુપ્રિયા પટેલ, દુષ્યંત સિંહ, નિશીકાંત દુબે અને અનુરાગ ઠાકુર પણ ગયા હતા. આ સિવાય ડેરેક ઓ બ્રાયન પણ હાલ સેલ્ફ આઈસોલેશનમાં છે. તે એક બેઠકમાં દુષ્યંત સિંહની બાજુમાં જ બેઠા હતા. દુષ્યંત સિંહની સાથે લંચ કરનાર ભાજપ સાંસદ વરુણ ગાંધી અને કોંગ્રેસ સાંસદ દીપેન્દ્ર હુડ્ડાએ પણ પોતાને આઈસોલેટ કરી લીધા છે. આ સાથે અનુપ્રિયા પટેલે પણ આઈસોલેશનમાં છે જેની જાણકારી તેમણે ટ્વિટ કરીને આપી છે. 

કનિકા કપૂર પર છે આ આરોપ

કનિકા કપૂર ડબલ મુસીબતમાં છે. એક તો કોરોના વાયરસની ઝપેટમાં આવી છે તો બીજી બાજુ તેના પર કોરોનાને લઈને નિયમો તોડવાનો આરોપ લાગ્યો છે. કનિકા પર આરોપ લાગ્યો છે કે તે ઍરપોર્ટ સ્ટાફની મિલીભગતને કારણે મેડિકલ તપાસથી બચીને ઘરે ચાલી ગઈ. જ્યારે પ્રોટોકૉલ મુજબ લંડનથી આવનારા તમામની સ્ક્રિનિંગ થાય છે. આરોપ છે કે બાદમાં તે લોકોને મળતી રહી હતી. લખનઉમાં રવિવારની પાર્ટીમાં શામેલ થઈ હતી અને આ પાર્ટીમાં 100થી વધુ લોકો હાજર હતાં. આ ઉપરાંત તે એક ફાઈવ સ્ટાર હોટલમાં પણ ગઈ હતી.