મેઘો મુશળધાર / નવસારીમાં ધોધમાર વરસાદ, અત્ર...તત્ર...સર્વત્ર...પાણી જ પાણી; તંત્ર એલર્ટ

• નવસારીમાં મેંઘરાજાની તોફાની બેટિંગ 
• શાંતાદેવી વિસ્તાર, શાક માર્કેટ પાસે ભરાયા વરસાદી પાણી 
• પાણી ભરાતા વિદ્યાર્થીઓને શાળાએ જવામાં પરેશાની

રાજ્યમાં ફરી વરસાદી માહોલ જામ્યો છે. ત્યારે નવસારી શહેર અને જિલ્લામાં છેલ્લા ત્રણ દિવસથી અવિરત વરસાદ વરસી રહ્યો છે. જો 24 કલાકની વાત કરવામાં આવે તો નવસારીમાં 4થી 6 ઈંચ જેટલો વરસાદ વરસી ચૂક્યો છે. ભારે વરસાદને પગલે જનજીવન પ્રભાવિત થયું છે. નીચાણવાળા વિસ્તારોમાં વરસાદી પાણી ભરાઈ જતાં લોકોને ભારે હાલાકી વેઠવાનો વારો આવ્યો છે.

વહેલી સવારથી ધોધમાર વરસાદ

આજે વહેલી સવારથી મેંઘરાજાએ તોફાની બેટિંગ કરતા નવસારીની વિવિધ બજારોમાં પાણી ભરાયા હતા. તો ટાટા સ્કૂલ, શાંતાદેવી વિસ્તાર, શાકભાજી માર્કેટ પાસે પાણી ભરાયા હતા. ભારે વરસાદને પગલે રસ્તાઓ બેટમાં ફરાવાઈ જતા ત્યાંથી પસાર થતાં વાહનચાલકોને ભારે મુશ્કેલીનો સામનો કરવો પડ્યો હતો. તો રહેણાક વિસ્તારોમાં પાણી ભરાવાને કારણે વિદ્યાર્થીઓને સ્કૂલે જવામાં વિલંબ થયો હતો.

વાંસદા તાલુકામાં 6.20 ઇંચ વરસાદ

છેલ્લા 24 કલાકમાં પડેલા વરસાદની વાત કરીએ તો સૌથી વધુ વરસાદ વાંસદામાં પડ્યો છે. વાંસદામાં 6.20 ઈંચ વરસાદ ખાબક્યો છે. જ્યારે ખેરગામમાં 5.56 ઈંચ, નવસારીમાં 5.28 ઈંચ, ચીખલીમાં 4.88 ઈંચ, ગણદેવીમાં 4.84 ઈંચ અને જલાલપોરમાં 3.73 ઈંચ જેટલો વરસાદ ખાબક્યો છે. 

નદીની સપાટી વધતા તંત્ર અલર્ટ

હવામાન વિભાગની આગાહીને પગલે દક્ષિણ ગુજરાત સહિત નવસારી જિલ્લામાં ધોધમાર વરસાદ પડ્યો છે. બુધવારે દિવસે નવસારી જિલ્લામાં ખાસ વરસાદ પડ્યો નહોતો. પરંતુ મોડી રાત્રે વાતાવરણ પલટાયું અને નવસારી શહેર સહિત જિલ્લામાં ભારે વરસાદ વરસ્યો. ગુરુવારે પણ મેંઘરાજાએ ધમાકેદાર બેટિંગ કરતા પાણી-પાણી થઈ ગયું હતું. વરસાદના કારણે નદી અને જળાશયોમાં પાણીની આવક  પૂર્ણા અને અંબિકા નદીની સપાટી વધી છે. તો ચીખલી વિસ્તારમાંથી પસાર થતી કાવેરી નદી ભયજનક સપાટીએ પહોંચવાની તૈયારીમાં છે. નદીના જળસ્તરોમાં વધારો થતાં તંત્ર એલર્ટ થઈ ગયું છે. વહીવટી તંત્ર દ્વારા  સાવચેતીના ભાગરૂપે લોકોને નદી કિનારા નજીક ન જવા સૂચના આપવામાં આવી છે.