વાપી-શામળાજી નેશનલ હાઇવે 56ના 2 ટૂકડા થઈ ગયા છે, જેના કારણે આ હાઈવે વાહનોની અવરજવર માટે બંધ કરવામાં આવ્યો છે.
નવસારીના વાંસદા તાલુકામાંથી પસાર થતો હાઇવે બેસી ગયો
હાઈવ પરથી પસાર થનાર બે બાઈક ચાલકોને ઇજા
નેશનલ હાઇવે 56 વાહનોની અવરજવર માટે બંધ કરાયો
નવસારી જિલ્લામાં ભારે વરસાદના કારણે રસ્તા અને પુલને મોટા પ્રમાણમાં નુકસાન થયું છે. ત્યાર જિલ્લામાંથી વધુ એક સમાચાર સામે આવ્યા છે. વાપી-શામળાજી નેશનલ હાઇવે બેસી જતા વાહનચાલકો અટવાયા છે.
વાહનોની અવરજવર બંધ કરાઈ
નવસારીના વાંસદા તાલુકામાંથી પસાર થતો વાપી-શામળાજી નેશનલ હાઇવે બેસી ગયો છે. જેના પગલે 2 બાઈક ચાલકોને ઈજા પહોંચી છે. તેઓને સારવાર માટે હોસ્પિટલ ખાતે ખસેડવામાં આવ્યા છે. આ ઉપરાંત નેશનલ હાઇવે 56 વાહનોની અવરજવર માટે બંધ કરવામાં આવ્યો છે.
હાઈવેના 2 ટૂકડા જ થઈ ગયા
વાડીચોંઢા ગામ નજીક હાઇવે ધોધમાર વરસાદના પગલે ધોવાઈ ગયો છે. આ હાઈવેના 2 ટૂકડા જ થઈ ગયા છે અને એ જમીનમાં ધસી ગયા છે. નેશનલ હાઇવે 56 વાહનોની અવરજવર માટે બંધ કરવામાં આવ્યો છે. હાઈવે પરથી એકપણ વાહનને પસાર થવામાં દેવામાં આવતું નથી. જેના કારણે વાહનચાલકો અટવાયા છે.
દર વર્ષે ઉભી થાય છે આ સમસ્યા
આપને જણાવી દઈએ કે, વાપી-શામળાજી હાઇવે પર દર વર્ષે ચોમાસામાં ખાડાઓનું સામ્રાજ્ય ઉભું થાય છે. દર વર્ષે આ સમસ્યા ઉભી થાય છે, સતત 24 કલાક વાહનવ્યવહારથી ધમધમતો આ હાઇવે પર દર વર્ષે પડતા મસમોટા ખાડાઓને કારણે અનેક અકસ્માતો થતા હોય છે છતાં હાઇવે ઓથોરિટીની ઊંઘ ઊડતી નહીં હોવાનું પ્રતીત થઈ રહ્યું છે.