વાપી: સંઘ પ્રદેશ દાદરાનગર હવેલીના પાટનગર સેલવાસમાં દબાણ હટાવ ઝુંબેશને લઈ રાત્રે હાઈવોલ્ટેજ ડ્રામા સર્જાયો હતો. સેલવાસની પ્રખ્યાત લાયન્સ સ્કૂલનો કેટલોક ભાગ દબાણમાં આવતો હોવાથી દ્વારા તંત્ર દ્વારા અગાઉ પણ દબાણ દૂર કરવાનો પ્રયાસ કરવામાં આવ્યો હતો. ત્યારે પણ આ મામલો કોર્ટ સુધી પહોંચ્યો હતો.
પરંતુ કોર્ટે તંત્રની કાર્યવાહીને યોગ્ય ઠેરવતા કોર્પોરેશન તંત્ર ફરી એકવાર દબાણ દૂર કરવા માટે પહોંચ્યું હતું. જેમાં રાતે સ્કૂલનો કેટલોક ભાગ તોડી નાંખવાથી સ્કૂલ દ્વારા હોબાળો મચાવવામાં આવ્યો હતો. સ્કૂલ કેમ્પસમાં દબાણ દૂર કરવા પહોચેલા JCB મશીનો સામે સ્કૂલનો 100થી વધુનો સ્ટાફ બેસી ગયો હતો. આ ઘટનાને પગલે મોટા પાયે વિરોધ કરવામાં આવ્યો હતો જો કે અંતે સ્થિતિ કાબૂમાં નહીં આવતા સ્થાનિક કલેક્ટર દ્વારા 144 કલમ લાગુ કરવામાં આવી હતી.
ઉલ્લેખનીય છે કે લાયન્સ સ્કૂલના ટ્રસ્ટી ફતેસિંહ ચૌહાણ દાદરા નગર હવેલી પ્રદેશ ભાજપમાં મોટુ માથું છે. ત્યારે અનેક અટકળો વહેતી થઈ છે. રાતે જ સ્કૂલમાં દબાણ હટાવવાની કામગીરી હાથ ધરાતા રાજકરણ ગરમાયું હતું. તો ઘટનાના પગલે પોલીસનો મોટો કાફલો પણ પહોંચ્યો હતો.
આપને જણાવી દઇએ કે સેલવાસમાં આવેલ લાયન્સ સ્કૂલના ટ્રસ્ટી પદે ફતેસિંહ ચૌહાણ છે જે ભાજપના સ્થાનિક નેતાઓમાં આગળ પડતુ નામ ધરાવે છે. ત્યારે તેમની જ શાળામાં દબાણ હટાવવાની કામગીરી હાથ ધરવામાં આવતા અનેક તર્ક વિતર્ક સર્જાયા હતા.