અકસ્માત / Photos: અમદાવાદમાં વંદે ભારત એક્સપ્રેસની રફ્તાર પર લાગી 'બ્રેક', એન્જિનમાં થયું નુકસાન-બે પશુના મૃત્યુ

• વંદે ભારત એક્સપ્રેસને ગુરુવારે નડ્યો અકસ્માત 
• વટવા સ્ટેશનથી મણિનગર વચ્ચે બન્યો બનાવ
• વચ્ચે ભેંસોનું ટોળું આવી પહોંચતાં થયો અકસ્માત

ગુજરાતના મુંબઈ સેન્ટ્રલ અને ગાંધીનગર વચ્ચે દોડતી વંદે ભારત એક્સપ્રેસને ગુરુવારે અકસ્માત નડ્યો હતો. વટવા સ્ટેશનથી મણિનગર વચ્ચે રેલવે લાઇન પર ભેંસોનું ટોળું આવી પહોંચતાં સવારે 11.15 વાગ્યાની આસપાસ આ અકસ્માત સર્જાયો હતો. ટ્રેનના એન્જિનનો આગળનો ભાગ ક્ષતિગ્રસ્ત થયો હતો. તમામ મુસાફરો સુરક્ષિત છે. પશ્ચિમ રેલવેના સીનિયર પીઆરઓ જે કે જયંતીએ આ જાણકારી આપી હતી.

અમદાવાદ-મુંબઈ વચ્ચેનો સમય સાડા પાંચ કલાક
આ ટ્રેનને વડા પ્રધાન નરેન્દ્ર મોદીએ 30 સપ્ટેમ્બરના રોજ લીલી ઝંડી આપી હતી. તેમણે ગાંધીનગરથી ટ્રેનને લીલી ઝંડી આપી પ્રસ્થાન કરાવ્યું હતું. ટ્રેન બપોરે 2 વાગ્યે અમદાવાદ રેલ્વે સ્ટેશનના પ્લેટફોર્મ 9 થી નીકળી હતી અને સાંજે 7.30 વાગ્યે મુંબઇ સેન્ટ્રલ રેલ્વે સ્ટેશન પર પહોંચી હતી. નવી 'વંદે ભારત એક્સપ્રેસ'ની સેમી હાઈસ્પીડ ટ્રેને અમદાવાદ-મુંબઈ વચ્ચેના 492 કિ.મી.ના પટ્ટાને સાડા પાંચ કલાકમાં આવરી લીધો હતો.

Vande Bharat Express running b/w Mumbai Central to Gurajat's Gandhinagar met with an accident after a herd of buffaloes came on the railway line at around 11.15am b/w Vatva station to Maninagar. The accident damaged the front part of the engine: Western Railway Sr PRO, JK Jayant pic.twitter.com/OLOMgEv10G

— ANI (@ANI) October 6, 2022

વંદે ભારત ટ્રેનોની શ્રેણીમાં આ ત્રીજી ટ્રેન છે
મહારાષ્ટ્ર અને ગુજરાતની રાજધાનીઓને જોડતી આ ટ્રેન વંદે ભારત ટ્રેનની શ્રેણીની ત્રીજી ટ્રેન છે, જેનું સંચાલન આણા દેશમાં કરવામાં આવ્યું છે. આ શ્રેણીની પ્રથમ ટ્રેન નવી દિલ્હીથી વારાણસી વચ્ચે શરૂ કરવામાં આવી હતી જ્યારે બીજી ટ્રેન નવી દિલ્હી અને માતા વૈષ્ણો દેવી, કટરા વચ્ચે શરૂ થઈ હતી.

સામાન્ય લોકો માટે કાર્યરત
1 ઓક્ટોબરથી સામાન્ય લોકો માટે ગાંધીનગર-મુંબઈ વંદે ભારત સુપરફાસ્ટ એક્સપ્રેસ શરૂ થઈ હતી. તે રવિવાર સિવાય અઠવાડિયામાં છ દિવસ કાર્યરત રહેશે. આ ટ્રેન મુંબઇ સેન્ટ્રલ સ્ટેશનથી સવારે 6.10 વાગ્યે ઉપડે છે અને બપોરે 12.30 વાગ્યે ગાંધીનગર પહોંચે છે. ટ્રેન ગાંધીનગરથી બપોરે 2.05 વાગ્યે ઉપડે છે અને રાત્રે 8.35 વાગ્યે મુંબઇ સેન્ટ્રલ પહોંચે છે. આ ટ્રેન સુરત, વડોદરા અને અમદાવાદ સ્ટેશન પર ઊભી રહે છે.