રેકોર્ડ / વંદે ભારત એક્સપ્રેસે બુલેટ ટ્રેનનો રેકૉર્ડ તોડ્યો: પાંચ જ કલાકમાં અમદાવાદથી મુંબઈ પહોંચી, જાણો સ્પીડ કેટલી 

• દેશની પ્રથમ સેમી હાઈ સ્પીડ અને નવી વંદે ભારત ટ્રેને ટેસ્ટ રન દરમ્યાન નવો રેકોર્ડ બનાવ્યો
• બુલેટ ટ્રેનને પાછળ છોડીને ટ્રેને 52 સેકન્ડમાં 0 થી 100 કિમી પ્રતિ કલાકની ઝડપ પકડી
• બુલેટ ટ્રેનને આ સ્પીડ હાંસલ કરવામાં 54.6 સેકન્ડનો સમય લાગ્યો

દેશની પ્રથમ સેમી હાઈ સ્પીડ અને નવી વંદે ભારત ટ્રેને ટેસ્ટ રન દરમ્યાન એક નવો રેકોર્ડ બનાવ્યો છે. બુલેટ ટ્રેનને પાછળ છોડીને ટ્રેને 52 સેકન્ડમાં 0 થી 100 કિમી પ્રતિ કલાકની ઝડપ પકડી હોવાની માહિતી  રેલવે મંત્રી અશ્વિની વૈષ્ણવે આપી છે.  મહત્વનું છે કે, દેશની આ ત્રીજી વંદે ભારત ટ્રેન છે. જે અમદાવાદ-મુંબઈ રૂટ પર ચલાવવામાં આવશે.

રેલમંત્રી વૈષ્ણવે જણાવ્યું કે, વંદે ભારત ટ્રેનનું ત્રીજું ટેસ્ટ ગુરુવારે થયું. તેણે 52 સેકન્ડમાં 0 થી 100 કિમી પ્રતિ કલાકની ઝડપ પકડી, જ્યારે બુલેટ ટ્રેનને આ સ્પીડ હાંસલ કરવામાં 54.6 સેકન્ડનો સમય લાગ્યો. નવી ટ્રેનની મહત્તમ સ્પીડ 180 kmph છે, જ્યારે જૂની વંદે ભારત ટ્રેનની મહત્તમ સ્પીડ 160 kmph છે.

અમદાવાદથી મુંબઈ કેટલા કલાકમાં પહોંચી ટ્રેન ? 

નવી વંદે ભારત ટ્રેનનું શુક્રવારે અમદાવાદ-મુંબઈ વચ્ચે ટ્રાયલ કરવામાં આવ્યું હતું. આ ટ્રેન અમદાવાદથી સુરત માત્ર 2 કલાક 32 મિનિટમાં પહોંચે છે જ્યારે શતાબ્દી એક્સપ્રેસ 3 કલાક લે છે. અમદાવાદથી સવારે 7.06 કલાકે ઉપડી અને સવારે 9.38 કલાકે સુરત સ્ટેશન પહોંચ્યું. અહીંથી 12.16 કલાકે રોકાયા વિના મુંબઈ સેન્ટ્રલ પહોંચી. અમદાવાદથી મુંબઈ 492 કિમીનું અંતર કાપવામાં ટ્રેન માત્ર 5 કલાક 10 મિનિટ લે છે, જ્યારે શતાબ્દી એક્સપ્રેસ અમદાવાદથી મુંબઈ સેન્ટ્રલ પહોંચવામાં 6 કલાક 20 મિનિટ લે છે.

आत्मनिर्भर भारत की रफ़्तार… #VandeBharat-2 at 180 kmph. pic.twitter.com/1tiHyEaAMj

— Ashwini Vaishnaw (@AshwiniVaishnaw) August 26, 2022

વંદે ભારત ટ્રેનની વિશેષતાઓ

રેલવે મંત્રાલયના સૂત્રોએ જણાવ્યું હતું કે, વંદે ભારત એક્સપ્રેસની નવી ડિઝાઇનમાં ફોટોકેટાલિટીક એર પ્યુરિફાયર સિસ્ટમ છે, જે 99% જંતુઓ અને વાયરસને મારી શકે છે. વંદે ભારત ટ્રેનમાં પ્લેનની વિશેષતાઓ છે. આ ટ્રેનમાં એસી, ટીવી, ઓટોમેટિક દરવાજા, હાઈ ક્લાસ પેન્ટ્રી અને વોશરૂમ છે.

વંદે ભારત સંપૂર્ણપણે મેડ ઈન ઈન્ડિયા છે. ટ્રેનમાં સ્વ-સંચાલિત એન્જિન છે, એટલે કે કોઈ અલગ એન્જિન જોડાયેલ નથી. એક્ઝિક્યુટિવ કોચની બેઠકો વિસ્ટાડોમ બેઠકોની જેમ 180 ડિગ્રી સુધી ફેરવી શકાય છે. નવી ટ્રેને તેની ગુણવત્તા અને સવારી સૂચકાંકમાં સુધારો કર્યો છે. મંત્રાલયને અપેક્ષા છે કે વંદે ભારત ટ્રેનોની નવી બેચ ઓક્ટોબરથી દર મહિને શરૂ થશે.