આજના ઈન્ટરનેટ અને સોશિયલ મીડિયાનાં જમાનામાં યુવાનોમાં તાત્કાલિક રૂપિયા કમાવાની ઘેલછામાં ભારે વધારો થયો છે. દેખાદેખીમાં આજનું યુવાધન ખોટા ખર્ચા કરતાં પણ અચકાતા નથી. ત્યારે નવી પેઢીના સ્વભાવને પારખીને કેટલીક લેભાગુ ગેંગ સક્રિય બની છે. મોબાઈલમાં આવતી ઓનલાઇન એપ્લિકેશન કોઈપણ પ્રકારની ગેરેન્ટી વિના તાત્કાલિક લોન આપતી હોય છે. જોકે આ એપ્લિકેશન દ્વારા અપાતી લોનમાં જો કોઈ ફસાયા પછી તેની શું હાલત થાય છે તે જાણો. કોણ છે આ એપ્લિકેશન નો શિકાર અને એવું તો શું કર્યું કે તેને હવે વલસાડ સિટી પોલીસ સ્ટેશનની હવા ખાવાનો વારો આવ્યો છે.
ઓનલાઇન એપ્લિકેશનથી યુવકે લીધા હતા પૈસા
એપ્લિકેશન દ્વારા હવે રૂપિયાની ઉઘરાણી માટે વારંવાર ફોન આવતા હતા
રાજને પોતાના જ અપહરણનું તરકટ ઘડી કાઢ્યું હતું
વલસાડના હાલર રોડ વિસ્તારમાં રહેતા રાજન દમણીયા જે ગત 25 નવેમ્બરના રોજ ગુમ થયો હતો. પોતાના દીકરાને ગુમ થયા બાદ પિતા સતીશકુમાર દ્વારા વલસાડ સિટી પોલીસ સ્ટેશનમાં ફરિયાદ નોંધાવી હતી. ગુમ થનાર દીકરાની ચિંતામાં બેબાકળા બનેલા રાજનના પિતાને એક વોટ્સએપ પર ખંડણીનો મેસેજ આવ્યો હતો. જેને લઇને વલસાડ સીટી પોલીસ હરકતમાં આવી હતી. વલસાડ સીટી પોલીસે ગણતરીના સમયમાં બપોરે થયેલા આ યુવાનનું લોકેશન મેળવી લીધું હતું અને સુરતના અડાજણથી આ યુવાનને સહી સલામત વલસાડ લાવવામાં આવ્યો હતો. વલસાડ લાવ્યા બાદ આ યુવાને જે ખુલાસા કર્યા તે સાંભળીને ખુદ પોલીસ અને યુવાનના પિતા પણ ચોંકી ગયા હતા.
પોતાના ગજા બહારની લોન મેળવી મોજ શોખ કર્યા હતા
પોલીસની પ્રાથમિક તપાસમાં બહાર આવ્યું હતું કે રાજન દમણિયા કેટલાક સમયથી ઓનલાઇન એપ્લીકેશનનો ઉપયોગ કરી લોન મેળવી રહ્યો હતો. પોતાના ગજા બહારની લોન મેળવી મોજ શોખ કરી રહેલા રાજનને એપ્લિકેશન દ્વારા હવે રૂપિયાની ઉઘરાણી માટે વારંવાર ફોન કરી પરેશાન કરવામાં આવતો હતો. તેને જ લઈને અંતે રાજને પોતાના જ અપહરણનું તરકટ ઘડી કાઢ્યું હતું.
રાજને પોતાના જ અપહરણનું તરકટ ઘડી કાઢ્યું હતું
આમ પોલીસને ગુમરાહ કરનાર રાજન અત્યારે વલસાડ સિટી પોલીસ આ મામલે રાજન વિરુદ્ધ પોલીસને ગેરમાર્ગે દોરવા બદલ કાયદેસરની કાર્યવાહી શરૂ કરી છે. યુવાનના પિતા સતીશકુમાર પોતાના દીકરો પરત આવવાની ખુશ જોવા મળી રહ્યા છે. પરંતુ પોતાની પીઠ પાછળ પોતાના જ પિતાને અપહરણનું નાટક રચી બ્લેકમેલ કરવાના અને ખંડણી માંગવાથી પિતા પણ શોકમાં ગરકાવ થઈ ગયા છે. પોતાના જ નાટકનું તરકટ રચનારા યુવાનનો આ કિસ્સો હાલ ટોક ઓફ ધ ટાઉન બન્યો છે. ત્યારે વલસાડ સીટી પોલીસે પણ આજના યુવાનોને આ પ્રકારની ઓનલાઇન એપ્લીકેશનથી લોન ન લેવા માટેની તાકીદ કરી છે.