કાર્યવાહી / વલસાડના ASI સતીષ સોમવંશી કરતૂત, બુટલેગર પાસે માંગી લાંચ, ASIનો પન્ટર ACBના જાપ્તામાં

• ASIનો પન્ટર લાંચ લેતા ઝડપાયો
• ASI સતીષ સોમવંશીની શોધખોળ ચાલુ
• બુટલેગરે વલસાડ ASI વિરૂધ્ધ ફરીયાદ કરી હતી

વલસાડના બુટલેગરને પાસા હેઠળ જેલમાં ધકેલી દેવાની ધમકી આપીને રૂપિયા 50 હજારની લાંચ માંગવામાં આવી હતી. આ બુટલેગરે વલસાડ રૂરલ પોલીસના એએસઆઇ વિરૂધ્ધ સુરત એસીબીમાં ફરિયાદ નોંધાવી હતી અને એએસઆઇ વતી લાંચ લેવા સુરતમાં આવેલા પોલીસના પન્ટરને એસીબીની ટીમે ઝડપી લીધો હતો.

વલસાડમાં દારૂનો ધંધો કરનારા એક બુટલેગરને પાસા હેઠળ જેલ હવાલે કરવાની ધમકી આપીને વલસાડ રૂરલ પોલીસમાં ફરજ બજાવતા એએસઆઇ સતીષ સયાજી સોમવંશીએ તેની પાસે રૂપિયા 50 હજારની લાંચ માંગી હતી. બુટલેગર ઉપર સતત દબાણ કરીને તેની પાસેથી લાંચ મેળવવા માટે પ્રયાસ કરી રહેલા એએસઆઇના ત્રાસથી કંટાળીને બુટલેગરે તેના મિત્રને જાણ કરી હતી જેથી તેના મિત્રએ એસીબીમાં ફરિયાદ નોંધાવવા કહ્યું હતું.બુટલેગરે સુરત એસીબીમાં ફરિયાદ નોંધાવી હતી અને એએસઆઇને લાંચની રકમ લેવા સુરત આવવા માટે જાણ કરી હતી. 

ASI સતીષ સોમવંશીએ પોતાના પન્ટર રામસીંગ પાટીલને સુરતમાં લાંચના રૂપિયા લેવા માટે મોકલ્યો હતો. સુરત આવીને રામસીંગે બુટલેગરનો સંપર્ક કરતા બુટલેગરે રામસીંગને સુરતના સીમાડા નાકા પર આવેલા ગણેશ પાન સેન્ટર પર આવવા કહ્યું હતું. આ સ્થળ પર અગાઉથી જ એસીબીના માણસો ખાનગી ડ્રેસમાં ગોઠવાઇ ગયા હતા. રામસીંગ પાટીલે બુટલેગર પાસેથી રૂપિયા 50 હજારની લાંચ સ્વિકારતાની સાથે જ એસીબીની ટીમે તેને દબોચી લીધો હતો. તેમજ તેને પોલીસ સ્ટેશન પર લાવીને પુછપરછ હાથ ધરી હતી. એસીબીની ટીમ દ્વારા હાલ એએસઆઇ સતીષ સોમવંશીને ઝડપી પાડવાની કાર્યવાહી પણ હાથ ધરવામાં આવી છે.