વિદેશ જવાનું સ્વપ્નું કોનું ન હોય? જેમના માતા-પિતા ખેતી અને મજૂરી કરે છે. તેમના સંતાનને વિદેશ ફરવા જવું હોય તો? માત્ર વિચાર જ કરી શકે? કારણ કે, તેવુ શક્ય હોતું નથી. પરંતુ ગુજરાતના એક છેવાડાના એક આદિવાસી ગામમાં આવું જ કાંઈક શક્ય બન્યું છે. જ્યાંના 40 વિદ્યાર્થીઓ થાઈલેન્ડના પ્રવાસે જઈ રહ્યા છે અને તે પણ માત્ર 4 હજાર રૂપિયામાં. જાણો કેવી રીતે આ શક્ય બન્યું...
ભૂલકાંઓ હાલ્યાં ફોરેન ફરવા
40 બાળકો જશે થાઈલેન્ડના પ્રવાસે
માત્ર 4 હજારમાં બાળકો ફરી આવશે થાઈલેન્ડ
વલસાડ જિલ્લાના છેવાડે આવેલા આદિવાસી ગામ રોલાની પ્રાથમિક શાળાના વિદ્યાર્થીઓ થાઈલેન્ડના પ્રવાસે જઈ રહ્યા છે. આ બાળકોની ખુશીનો આજે કોઈ પાર નથી. કારણ કે, તેમણે તો માત્ર વિદેશમાં ફરવાના સ્વપ્ના જ જોયા હતા. ક્યારેય પોતાનું સ્વપ્ન સાકાર થશે તેવું નહોતું વિચાર્યું. જે આજે એકા-એક સાકાર થવા જઈ રહ્યું છે અને તે પણ પોતાના ગામના સરપંચના બાળકો પ્રત્યેના પ્રેમના કારણે.
આ ગામના સરપંચ ચિંતન પટેલ જેમણે બાળપણમાં પ્રવાસના સ્વપ્ન જોયા હતા. પરંતુ પોતાની આર્થિક સ્થિતિના કારણે ક્યારેય જઈ ન શક્યા. પરંતુ હવે જ્યારે પોતે સધ્ધર બની ગયા અને ગામના સરપંચ બની ગયા છે. તો તેમને વિચાર આવ્યો કે, હું તો મારા બાળપણમાં ફરી ન શક્યો પરંતુ આ બાળકો દ્વારા કેમ એ બાળપણને જીવી ન શકું. બસ આ જ ચાહત તેમનું લક્ષ્ય બની ગઈ અને તેઓ ગામની જ પ્રાથમિક શાળાના 40 બાળકોને ફરવા માટે થાઈલેન્ડ લઈ જઈ રહ્યા છે.
આપણને સવાલ એવો પણ થતો હશે કે, થાઈલેન્ડ નજીકમાં તો નથી તે મફતમાં જઈ શકાય. ખર્ચો તો થતો હશેને. આ બાળકો ખર્ચો ક્યાંથી નિકાળશે. પરંતું કહેવાય છેને કો જ્યાં સ્વાર્થ ન હોય ત્યાં બધું શક્ય છે. આ તમામ વિદ્યાર્થીઓના માતા-પિતાને માત્ર 4 હજાર રૂપિયાનો જ ખર્ચ ઉઠાવવો પડશે. બાકીનો 30 હજાર જેટલો ખર્ચ ગામના સરપંચ અને તેના મિત્રો સાથે ગામના કોટલાક દાનવીરો ઉઠાવી રહ્યા છે. થાઈલેન્ડનો આ પ્રવાસ 6 દિવસ અને 5 રાત્રીનો હશે. જેમાં 40 વિદ્યાર્થીઓ સાથે 4 શિક્ષક અને ગામના 20 યુવકો પણ જશે. આ તમામ યુવાનો બાળકોની સંભાળ માટે સ્વખર્ચે જઈ રહ્યા છે.
મહત્વનું છે કે, રોલા ગામના આ બાળકો આ પ્રથમ પ્રવાસે નથી જઈ રહ્યા. આ પહેલા તેઓ દેશના અનેક રાજ્યોનો અને ફરવા લાયક સ્થળોનો પ્રવાસ કરી ચૂક્યા છે. હવે પહેલી વખત વિમાનમાં બેસી વિદેશના પ્રવાસે જઈ રહ્યા છે. પરંતુ આ માટેનો શ્રેય તો ગામના સરપંચ અને યુવાઓને જ આપવો પડે. કારણ કે, તેઓ આ બાળકોને જીવનની એક યાદગાર ક્ષણ આપવા જઈ રહ્યા છે.