વલસાડ જિલ્લામાં પડેલા ધોધમાર વરસાદના પગલે જળબંબાકારની સ્થિતિ સર્જાઈ છે. સમગ્ર જિલ્લામાં સાર્વત્રિક વરસાદ પડતા મધુબન ડેમ ઓવરફ્લો થયો છે. તો આ તરફ દમણગંગા નદી પણ બે કાંઠે વહી રહી છે. ખાસ કરીને નિચાણવાળા વિસ્તારોમાં પાણી ભરાતા NDRFની ટીમને તૈનાત કરવામાં આવી છે.
વલસાડમાં છેલ્લા 8 કલાકમાં 2 ઈંચ વરસાદ પડયો છે. જ્યારે વાપીમાં 2 ઈંચ પારડીમાં અને ધરમપુરમાં 3-3 ઈંચ વરસાદ ખાબક્યો છે.
બીજી તરફ કપરાડા અને ઉમરગામમાં પણ 2-2 ઈંચ વરસાદ પડયો છે. તો દમણગંગા નદીમાં 1.5 લાખ ક્યૂસેક પાણી છોડવામાં આવતા નદી કિનારાના ગામોને એલર્ટ કરી દેવાયા છે.
આ ઉપરાંત માછીમારોને પણ નદીથી દૂર રહેવા માટે તંત્ર દ્વારા અપીલ કરવામાં આવી છે. ઉપરવાસમાં થયેલા ભારે વરસાદના કારણે ઔરંગા નદી ગાંડીતૂર થઈ છે. ઔરંગા નદીએ રૌદ્ર સ્વરૂપ ધારણ કર્યું છે. જેના કારણે પૂરની સ્થિતિ સર્જાઈ છે. ઔરંગા નદી પર આવેલા અનેક લો લેવબ્પુલ અને કોઝવે પર પાણી ફરી વળ્યા છે.
આપને જણાવી દઇએ કે રાજ્યના દક્ષિણ અને સૌરાષ્ટ્ર પ્રદેશમાં મેઘરાજાએ જમાવટ પાડી છે ત્યારે ઠેર-ઠેર ડેમમાં નવા નીર આવ્યા છે તો કેટલાક ડેમ ઓવરફ્લો પણ થયા છે.
ત્યારે વલસાડ જિલ્લામાં મેઘતાંડવ જોવા મળ્યું હતું અને દમણગંગા નદી 2 કાંઠે વહી હતી. આ સાથે જ ઔરંગા નદી ગાંડીતૂર થતા નીચાણવાળા વિસ્તારમાં પાણી ભરાઇ ગયા હતા.
જો કે ભારે વરસાદને પગલે કોઇ અઘટિત બનાવ ના બને તે માટે રાજ્ય સરકાર દ્વારા અગમચેતીના પગલારૂપે NDRFની ટીમને તૈનાત કરવામાં આવેલ છે.