વલસાડના પારડી ખાતે બે ફોરેસ્ટ અધિકારીઓએ કામ પૂરૂ કરવાને લઇને ફરિયાદી સમક્ષ લાંચ માગી હતી. જો કે ACBને મળેલી ફરિયાદના આધારે સપાટો બોલાવતાં બે વનરક્ષકને 10 લાખ રૂપિયાની લાંચ લેતા રંગેહાથ ઝડપ્યાં હતા. જેમાં પારડીના RFO ધર્મેન્દ્રસિંહ ચાવડા અને વનરક્ષક જીગર રાજપૂતે 10 લાખ રૂપિયાની માંગણી કરી હતી.
ACBએ કરેલી કાર્યવાહીમાં એક ફરાર
પારડી ખાતેના ACBના ઓપેરશનમાં ઝડપાયેલા બે વનરક્ષકોમાંના એક ફોરેસ્ટર ધર્મેન્દ્રસિંહ ચાવડા તકનો લાભ લઇ ફરાર થઇ ગયો હતો. જ્યારે અન્ય વનરક્ષક જીગર રાજપૂતની ધરપકડ કરી આગળની કાર્યવાહી હાથ ધરી હતી. જો કે ACBના સપાટામાં એક સાથે બે સરકારી કર્મચારીઓ ઉપર કાર્યવાહીને લઇને જિલ્લાના સરકારી બાબુઓમાં ફફડાટ જોવા મળ્યો છે.
ACBએ કર્મચારીઓને ઝડપવા છટકું ગોઠવ્યું
પારડી ખાતે એસીબીએ સપાટો બોલાવતાં ફોરેસ્ટર અને વનરક્ષકને 10 લાખ રૂપિયાની લાંચ લેતા ઝડપી પાડ્યાં હતા. જો કે આ ફરિયાદી લાંચ આપવા માંગતા ન હોય તેઓએ ACBનો સંપર્ક કર્યો હતો. જેને લઇને ACBએ છટકું ગોઠવ્યું હતું. જેમાં ફરિયાદી 10 લાખ રૂપિયા લઇને ફોરેસ્ટ વિભાગની કચેરીએ પહોંચ્યા હતા.