મરાઠા બટાલિયન / નામ ડૂબાડયું.! વલસાડમાં દારૂની હેરાફેરી કરતા 2 આર્મી જવાન ઝડપ્યા, પાર્ટી કરવા 552 બોટલ કારમાં નાખી નીકળ્યા હતા

• વલસાડ પોલીસે દારૂની હેરાફેરી કરતા 2 આર્મી જવાન ઝડપ્યા
• આર્મી ડિફેન્સ લખેલી કારમાં કરતા હતા દારૂની હેરાફેર
• 17 દારૂની પેટી સાથે મરાઠા બટાલિયન જવાનોને ઝડપાયા 

ગુજરાતમાં કહેવાથી દારૂબંધી વચ્ચે છાશવારે દારૂના અનેક કિસ્સાઓ સામે આવે છે. દારૂના જથ્થા સાથે ઝડપાતા આરોપીઓ દારૂબંધી માત્ર કાગળ પર હોવાની ચાડી ખાઈ રહ્યા છે. આવી સ્થિતિ વચ્ચે વલસાડ પોલીસે દારૂની હેરાફેરી કરતા 2 આર્મી જવાનને દબોચી લેતા ચકચાર જાગી છે. જેની પૂછપરછમાં જવાનોએ પાર્ટી માટે દારૂનો જથ્થો મંગાવ્યો  હોવાનું બહાર આવ્યું હતું. આમ ગુજરાતમાં દારૂનો મોટો જથ્થો ઠલવાય તે પહેલાં જ પોલીસે દારૂનો જથ્થો ઝડપી પાડ્યો હતો.

મરાઠા બટાલિયનના જવાનો સામે કાર્યવાહી

લશ્કરમાં ફરજ બજાવતા 2 આર્મીમેન દમણથી નવસારી તરફ જતા હતા આ દરમિયાન વલસાડ જિલ્લાના ડુંગરા પોલીસને શંકા જતા તેઓએ આર્મી ડિફેન્સ લખેલી કાર અટકાવી તલાશી લીધી હતી. આ દરમિયાન કારમાંથી દારૂની પેટીઓ પકડાતા પોલીસ ચોંકી ઉઠી હતી. જેની પૂછપરછ કરી દમણથી નવસારી લઈ જવાતી 552 બોટલ દારૂનો જથ્થો જપ્ત કર્યો હતો. સાથે આર્મીના બે જવાનને પકડી પાડ્યા હતા. પોલીસે 17 દારૂની પેટી કબ્જે કરી મરાઠા બટાલિયનના જવાનો સામે કાર્યવાહી હાથ ધરી હતી. જેની પૂછપરછમા આ દારૂનો જથ્થો નવસારીમાં એક પાર્ટી કરવા માટે દમણથી લઈ જવામાં આવતો હોવાનો પર્દાફાશ થયો હતો.

મહત્વનું છે કે તાજેતરમાં જ અમીરગઢ એક પોસ્ટ ભરતી પોલીસે વિદેશી દારૂના જથ્થા સાથે આર્મી જવાનને ઝડપી પાડ્યો હતો. જેમાં જોધપુર આર્મી કેમ્પમાં ફરજ બજાવતો જવાન પરમિટ વગર ડિફેન્સનો વિદેશી દારૂ પોતાની કારમાં લઇ ગુજરાત આવી રહ્યો હતો આ દરમિયાન અમીરગઢ પોલીસે ઝડપી પાડ્યો હતો.