રાજ્યમાં વરસાદી માહોલ સર્જાયો છે. હવામાન વિભાગે વરસાદની આગાહી કરી છે. ત્યારે વલસાડ જિલ્લાના જંગલ વિસ્તારમાં આજે પણ ધોધમાર વરસાદ વરસ્યો છે. તાલુકામાં મૂશળધાર વરસાદને કારણે તમામ નદી-નાળાઓ બે કાંઠે વહી રહ્યા છે.
તો કપરાડામાંથી પસાર થતી નદીઓ અત્યારે તોફાની સ્વરૂપે વહી રહી છે. કોલક નદીએ ભયજનક સપાટી વટાવતાં નદીના પટમાં આવતા લો લેવલ કોઝવે અને નાના પૂલ પર પાણી ફરી વળ્યા છે. કપરાડામાં અનેક નીચાણવાળા કોઝવે ડુબાણમાં ગયા હતા. કોલક નદી પર આવેલા નાના પુલ પર નદીના પાણી ફરી વળતા આસપાસના વિસ્તારના ગામોનો સંપર્ક કપાયો હતો.
આથી લોકોએ જીવને જોખમમાં મૂકીને કોલકના ધસમસતા પ્રવાહમાંથી પસાર થવું પડ્યું હતું. ઉપરવાસમાં ભારે વરસાદને કારણે કોલક નદી ભયજનક સપાટી વટાવી હતી. આથી આ પુલ પર પાણી ફરી વળતા આસપાસના ગામના લોકો મુશ્કેલીમાં મુકાયા હતા. આથી ગામના લોકોની સાથે સ્કૂલથી પરત ફરતા નાના બાળકો અને શિક્ષકોએ પણ જીવને જોખમમાં મુકી કોલક નદીના ધસમસતા પ્રવાહને પસાર કરવો પડ્યો હતો.
આમ દર વર્ષે ચોમાસામાં ભારે વરસાદમાં આ વિસ્તારના લોકો આવી જ રીતે જીવને જોખમમાં મુકી અને કોલક નદીના ધસમસતા પ્રવાહમાંથી પસાર થવું પડે છે. આજે પણ સ્કૂલના વિદ્યાર્થીઓ જીવને જોખમમાં મૂકી આવી રીતે પુલ પરથી પસાર થવું પડ્યું હતું. આથી હવે આગામી સમયમાં પૂલની ઊંચાઈ વધારવામાં આવે તેવી આસપાસના ગામના લોકો માંગ કરી રહ્યા છે.