વલસાડના કાંજણહરી ગામમાં ચાલી રહેલી દારૂની પાર્ટીમાં અડધી રાત્રે પોલીસે સપાટો બોલાવતા LCBએ 40થી વધુ લોકોની અટકાયત કરી છે.
વલસાડમાં દારૂની મહેફિલ ઉપર પોલીસના દરોડા
કાંજણહરી ગામમાં તાલુકા સરપંચ સંઘના પ્રમુખ પણ ઝડપાયા
LCBએ 40થી વધુ લોકોની અટકાયત કરી
વલસાડમાં દારૂની પાર્ટી પર પોલીસે દરોડા પાડ્યા છે. વલસાડના કાંજણહરી ગામમાં દારૂની પાર્ટી ચાલતી હતી. એ દરમ્યાન પોલીસને બાતમી મળતા પોલીસે એકાએક રેડ પાડી હતી. દરમ્યાન તાલુકા સરપંચ સંઘના પ્રમુખ વિનોદ પટેલને પોલીસે ઝડપી પાડ્યા છે. આ ઘટનામાં LCBએ 40થી વધુ લોકોની અટકાયત પણ કરી છે. પોલીસે દારૂ સહિતનો મુદ્દામાલ કબજે કર્યો છે. આ મામલે તમામને બસમાં બેસાડીને રૂરલ પોલીસ સ્ટેશન લઈ જવાયા છે.
અડધી રાત્રે પોલીસે બોલાવેલા સપાટાના કારણે સમગ્ર પંથકમાં ચકચાર મચી ગઈ
અડધી રાત્રે પોલીસે બોલાવેલા સપાટાના કારણે સમગ્ર પંથકમાં ચકચાર મચી ગઈ હતી. આ બનાવની વિગત મુજબ વલસાડ LCB પોલીસને મળેલી બાતમીના આધારે વલસાડના કાંજનહરી ગામની હદમાં મોડી રાત્રે પોલીસે એક બંગલાની પાછળ ચાલતી સરાબ કબાબી મહેફિલ પર રેડ કરી હતી. ચાલતી મહેફિલમાં અચાનક જ પોલીસની એન્ટ્રી થતા મહેફિલમાં દોડધામ મચી ગઈ હતી.
જો કે પૂરી તૈયારી સાથે પહોંચેલી વલસાડ LCBની ટીમે આ કાર્યવાહીમાં પાર્ટી માણતા રાજકીય પાર્ટીઓના કાર્યકર્તાઓ અને તેમના સમર્થકોને વિદેશી દારૂની મહેફિલ માનતા રંગે હાથ ઝડપી પાડ્યા હતા. પોલીસની આ કાર્યવાહીમાં સ્થળ પરથી પોલીસને 25 લીટરથી વધુ વિદેશી દારૂનો જથ્થો, પાંચ મોંઘીદાટ કાર , બુલેટ અને બાઇક મળી લાખો રૂપિયાનો મુદ્દામાલ કબજે કરવામાં આવ્યો હતો.
રાજકીય પાર્ટીઓના અગ્રણીઓ અને કાર્યકર્તાઓની મહેફિલ ઝડપાતા જિલ્લાનું રાજકારણ ગરમાયું
પોલીસની આ કાર્યવાહીમાં વલસાડના નાનકવાડા ગ્રામ પંચાયતના સરપંચ અને ગ્રામ પંચાયતના કેટલાંક સભ્યોની સાથે તેમના સમર્થકો પણ પાર્ટી માણી રહ્યાં હતા. પાર્ટીમાં ઝડપાયેલા નાનકવાડા ગ્રામ પંચાયતના સરપંચ વિનોદ પટેલ વલસાડ તાલુકા સરપંચ સંઘના પ્રમુખ પણ છે. આમ, રાજકીય પાર્ટીઓના અગ્રણીઓ અને કાર્યકર્તાઓની મહેફિલ ઝડપાતા જિલ્લાનું રાજકારણ પણ ગરમાયું છે. મોડી રાત્રે સ્થળ પરથી ઝડપાયેલા તમામ આરોપીઓને પોલીસે બસમાં ભરી અને વલસાડ રૂરલ પોલીસ સ્ટેશન લાવવામાં આવ્યા હતા જ્યાં ઝડપાયેલા આરોપીઓ પોતાનો ચહેરો છુપાવતા જોવા મળ્યા હતા. જો કે પોલીસે કોઈ પણ શરમ રાખ્યા વિના આ કેસમાં કડક કાર્યવાહી કરી તમામની ધરપકડ કરી તેમના વિરોધ કાયદેસરની કાર્યવાહી હાથ ધરવામાં આવી છે.