ગુજરાતમાં ભારે વરસાદની આગાહી વચ્ચે રાજ્યમાં સાર્વત્રિક વરસાદ વરસી રહ્યો છે. દક્ષિણ ગુજરાતમાં સૌથી વધુ મેઘમહેર જોવા મળી રહી છે. જેમાં સુરત, નવસારી, ભરૂચ, વલસાડમાં ભારે વરસાદ વરસી રહ્યો છે. જેમાં વલસાડ જિલ્લાના તમામ તાલુકાઓમાં સાર્વત્રિક વરસાદ જોવા મળ્યો છે. જેને લઇને મધુબન ડેમમાં પાણીની આવક જોવા મળી છે.
વલસાડ જિલ્લામાં વરસાદી માહોલ
તમામ તાલુકાઓમાં સાર્વત્રિક વરસાદ
વલસાડના મધુબન ડેમમાં પાણીની આવક
વલસાડ જિલ્લામાં વરસાદી માહોલ જામ્યો છે. તમામ તાલુકાઓમાં સાર્વત્રિક વરસાદ વરસ્યો છે. ભારે વરસાદના કારણે વલસાડના મધુબન ડેમમાં પાણીની આવક થઇ છે. મધુબન ડેમનું જળસ્તર 75.85 મીટરે પહોંચ્યું છે.
હાલ મધુબન ડેમમાં 56,433 ક્યૂસેક પાણીની આવક થઇ રહી છે. જ્યારે ડેમમાંથી 57,640 ક્યૂસેક પાણીની જાવક છે. હાલ પાણીની ભારે આવકના પગલે ડેમના 4 દરવાજા 2 મીટર ખોલવામાં આવ્યાં છે. એક દિવસમાં વલસાડમાં 5.2 ઇંચ અને કપરાડામાં 4.6 ઇંચ વરસાદ નોંધાયો છે. ઉમરગામમાં 4.2 ઇંચ, ધરમપુરમાં 4.2 ઇંચ, પારડીમાં 3.2 ઇંચ અને વાપીમાં 1.8 ઇંચ વરસાદ વરસ્યો છે.
ઉલ્લેખનીય છે કે ગઇકાલે વલસાડ જિલ્લાના ઉપરવાસમાં ભારે વરસાદના પગલે જિલ્લાની તમામ નદી-નાળાઓએ તોફાની સ્વરૂપ ધારણ કર્યું હતું. દમણ ગંગા, કોલક નદીઓમાં પૂર જેવી પરિસ્થતિ જોવા મળી રહી છે. જેને લઇને તંત્રએ લોકોને નદી કિનારે નહી જવા સુચન કર્યું છે.