આરોગ્ય વિભાગ / ઝોલાછાપ નકલી ડૉક્ટરોથી સાવધાનઃ વલસાડ આરોગ્ય વિભાગે 7 નકલી તબીબોની કરી અટકાયત

• વલસાડ જિલ્લામાંથી બોગસ તબીબો ઝડપાયા
• 7 બોગસ તબીબો ઝડપાયા
• લોકોના આરોગ્ય સાથે કરતા હતા ચેડા

વલસાડ જિલ્લા સહિત સમગ્ર રાજ્યભરમાં કોરોના મહામારીનો કેર યથાવત જોવા મળી રહ્યો છે. તો બીજી તરફ વલસાડ જિલ્લામાંથી એક પછી એક નકલી ડૉક્ટરો ઝડપાઈ રહ્યા છે. વલસાડ જિલ્લામાં વલસાડ પોલીસ અને આરોગ્ય વિભાગની ટીમો દ્વારા લોકોના આરોગ્ય સાથે ચેડા કરતા અને કોઈ પણ જાતની માન્યતા વગર તબીબી પ્રેક્ટિસ કરતા બોગસ 7 તબીબોની અટકાયત કરવામાં આવી છે. સાથે જ મેડિકલના સાધનો અને દવાઓ સહિતનો મુદ્દામાલ જપ્ત કરવામાં આવ્યો છે.

આપને જણાવી દઈએ કે, વલસાડ જિલ્લામાં વલસાડ પોલીસ અને આરોગ્ય વિભાગની ટીમો દ્વારા જિલ્લાના વિવિધ વિસ્તારોમાં રેડ કરવામાં આવી હતી. આ દરમિયાન વલસાડ શહેર અને ગ્રામ્ય વિસ્તાર , ઉમરગામ તાલુકાના ભીલાડ, વાપી અને કપરાડા તાલુકાના નાનાપોંઢા વિસ્તારમાંથી બોગસ 7 તબીબ ઝડપાયા હતા.

તમામ તીબીબો આધાર પુરાવા અને મંજૂરી વગર પ્રેક્ટિસ કરતા હોવાનું પોલીસ તપાસમાં સામે આવ્યું છે. કોરોના મહામારીમાં કોઈપણ જાતની ડિગ્રી વગર ક્લિનિક ચલાવી લોકોના આરોગ્ય સાથે ચેડા કરતા હતા. આથી હાલ પોલીસે બોગસ 7 તબીબોની અટકાયત કરીને કાયદેસરની કાર્યવાહી હાથ ધરી છે.