વલસાડ નજીક આવેલ ગુંદલાવ જી.આઇ.ડી.સી.માં એક કંપનીમાંમાં ગરમ કેમિકલથી દાઝી જતા 9 કામદારો ઇજાગ્રસ્ત થયા હોવાની ઘટના સામે આવી છે. ઘટનાને લઈને સમગ્ર વિસ્તારમાં ચકચાર મચી ગઇ હતી
આ અંગે પ્રાપ્ત થતી વિગતોનુસાર ગુંદલાવ જી.આઇ.ડી.સી.માં આવેલી ડેમોસા કેમિકલ કંપનીમાં ઉત્પાદનની પ્રક્રિયા ચાલી રહી હતી. આ ઉત્પાદન પ્રક્રિયા દરમ્યાન કંપનીના બોઇલરમાંથી અચાનક ગરમ કેમિકલ ઉભરાયું હતું. જેથી બોઇલર નજીક કામ કરી રહેલા 9 કામદારો ગરમ કેમિકલ ની ઝપટમાં આવી ગયા હતા.
આ ઘટનાને પગલે કંપની માં દોડધામ મચી ગઈ હતી. જોકે ઇજાગ્રસ્ત કામદારો ને સારવાર માટે તાત્કાલિક વલસાડની કસ્તુરબા હોસ્પિટલમાં દાખલ કરવામાં આવ્યા હતા. ઘટનાની જાણ થતા જ પોલીસ ઘટના સ્થળે પહોંચી તપાસ હાથ ધરી હતી.
નોંધનીય છે કે ગુંદલાવ નીઆ ડેમોસા કંપની અગાઉ પણ અનેક વખત વિવાદમાં આવી ચૂકી છે. તેમજ કંપનીમાં કામ કરતા કામદારોની સુરક્ષા બાબતે કંપની સંચાલકો દ્વારા બેદરકારી દાખવવામાં આવતી હોવાના કિસ્સા અગાઉ પણ બની ચૂક્યા છે. ત્યારે ફરી એક વખત ડેમોસ કંપનીમાં બનેલી આ ઘટનામાં 9 કામદારો ગંભીર રીતે દાઝી જતા કંપની ફરી એક વખત વિવાદમાં આવી છે.
કામદારોની સુરક્ષા અંગે બેદરકારી દાખવનાર વિવાદિત ડેમોસા કંપની વિરુદ્ધ કાયદેસરની કાર્યવાહી કરવામાં આવે તેવી લોક માંગ ઉઠી રહી છે.