વલસાડ: જિલ્લામાં દારૂનાં કેસમાં વોન્ટેડ આરોપીને ઝડપવા જતાં પોલીસ ટીમ પર હુમલો થયો હોવાંની એક ઘટના સામે આવી છે. આરોપીઓને ઝડપવા જતાં પોલીસ અને આરોપીઓ વચ્ચે ફિલ્મી દ્રશ્યો સર્જાઇ ગયાં હતાં. દારૂ ભરેલી કાર રોકવા જતાં આરોપીઓએ પોલીસ પર હુમલો કર્યો હતો.
ધરમપુરનાં વાંકલદ ગામ નજીક આ ઘટના બની હતી. તો આરોપીઓએ પોલીસ ટીમ પર કાર ચઢાવી દેવાનો જીવલેણ હુમલો પણ કર્યો હતો. તેમજ ઘટનાનાં પગલે સ્વ બચાવમાં પોલીસને બે રાઉન્ડ ફાયરિંગ કરવાની પણ ફરજ પડી હતી. જો કે આ ઘટનામાં બુટલેગરો દારૂ ભરેલી કાર સાથે ભાગવામાં સફળ રહ્યાં હતાં. જો કે પોલીસે આ મામલે આરોપીઓને પકડવા માટે વધુ તજવીજ હાથ ધરી છે.
ઉલ્લેખનીય છે કે પોલીસે દારૂનાં કેસમાં આરોપીઓને ઝડપવા માટેનો પ્લાન કર્યો હતો. પરંતુ જ્યારે પોલીસે વલસાડમાં આવેલ ધરમપુરનાં વાંકલદ ગામ નજીક આરોપીઓને ઝડપવાની કોશિશ કરી હતી ત્યારે પોલીસની ટીમ પર જ વળતાનો તેઓએ હુમલો કર્યો હતો અને પોલીસે પણ સામે ફાયરિંગ કર્યું હતું.
જેથી એ જગ્યાએ ફિલ્મી દ્રશ્યો સર્જાઇ ગયાં હતાં અને આ ઘટનામાં બુટલેગરો દારૂ ભરેલી કાર સાથે ભાગવામાં સફળ રહ્યાં હતાં. પરંતુ હવે પોલીસ આ મામલે વધુ સક્રિય બની છે તેમજ તેઓને પકડવા માટેનાં શોધખોળનાં પ્રયાસો પણ હાથ ધર્યા છે.