આજે 14 ફેબ્રુઆરી વેલેન્ટાઈન ડેની ઉજવણી કરવામાં આવે છે. પરંતુ રાજ્યમાં કેટલીક જગ્યાઓ પર આ દિવસની અનોખી રીતે ઉજવણી કરવામાં આવી હતી. પ્રેમ એટલે યુવક-યુવતી વચ્ચેનો જ પ્રેમ નહીં પરંતુ જીવનમાં આવતા અનેક સંબંધો વચ્ચે જોડાયેલ લાગણી પણ એક પ્રેમ છે. ત્યારે આવા જ પ્રેમને બાળકો નાનપણથી જ સમજે તે માટે આ દિવસને કેટલીક જગ્યા પર માતૃ-પિતૃ પૂજન દિવસ તરીકે મનાવવામાં આવ્યો હતો.
વેલેન્ટાઈન-ડેની અનોખી ઉજવણી
રાજ્યની કેટલીક શાળાઓમાં ઉજવણી
માતૃ-પિતૃ પૂજન દિવસ તરીકે ઉજવ્યો
રાજકોટમાં વિરાણી હાઈસ્કૂલમાં વેલેન્ટાઈન-ડેની અનોખી ઉજવણી કરવામાં આવી હતી. વેલેન્ટાઇન-ડેને માતૃ-પિતૃ પૂજન દિવસ તરીકે ઉજવ્યો હતો. વિદ્યાર્થીઓએ માતા-પિતાનું પૂજન કર્યું હતું. માતા-પિતાના પૂજન બાદ ગાયોને લાડુ ખવડાવ્યા હતા.
મોરબીમાં પણ વેલેન્ટાઇન ડેને માતૃ-પિતૃ પૂજન દિવસ તરીકે ઉજવાયો
મોરબીની સાર્થક વિદ્યાલય દ્વારા 14 ફેબ્રુઆરીના દિવસને માતૃ-પિતૃ પૂજન દિવસ તરીકે ઉજવાયો હતો. શાળા દ્વારા દરેક બાળકોને તેના માતા-પિતાનું પૂજન કરવા જણાવ્યું હતું. જો દરેક શાળાઓ આ પ્રકારે બાળકોને નાનપણથી જ આપણી સાચી સંસ્કૃતી તરફ વાળતા રહેશે તો આગામી દિવસોમાં ચોક્કસ બાળકોમાં સંસ્કારોનું સિંચન થશે તેના બે મત નથી.
શિક્ષણ વિભાગનો આદેશ
મહત્વનું છે કે, સુરતમાં 14મી ફેબ્રુઆરી વેલેન્ટાઈન ડેના દિવસે શાળાઓમાં માતૃ-પિતૃ પૂજન દિવસ તરીકે ઉજવણી કરવાનો પરિપત્ર બહાર પાડી તમામ શાળાના આચાર્યને આદેશ કરવામાં આવ્યા હતા. રાજ્ય શિક્ષણ વિભાગ દ્વારા બાળકોને નાનપણથી સંસ્કાર મળે તે માટે આ પરિપત્ર જાહેર કરાયો હતો.